ಸಹೋದರನ ಮಾತು ಕೇಳಿ ಮೈಮೇಲೆ ಪೆಟ್ರೋಲ್ ಸುರಿದು ಬೆಂಕಿ ಹಚ್ಚಿಕೊಂಡ ಯುವತಿ!

ಮಹಿಳೆಯೊಬ್ಬರಿಗೆ ಆಕೆಯ ಸಹೋದರನೇ ಬೆಂಕಿ ಹಚ್ಚಿಕೊಳ್ಳುವಂತೆ ಮನವೊಲಿಸಿದ ಆಘಾತಕಾರಿ ಘಟನೆ ಉತ್ತರ ಪ್ರದೇಶದ ಶಹಜಹಾನ್‌ಪುರ ಜಿಲ್ಲೆಯಲ್ಲಿ ನಡೆದಿದೆ.

ಉತ್ತರ ಪ್ರದೇಶ: ಇಲ್ಲಿನ ಶಹಜಹಾನ್‌ಪುರ ಜಿಲ್ಲೆಯಲ್ಲಿ ಅಮಾನವೀಯ ಘಟನೆಯೊಂದು ನಡೆದಿದೆ. ನೆರೆಹೊರೆಯವರೊಂದಿಗೆ ಜಗಳವಾಡಿದ ಕಾರಣಕ್ಕೆ ಪೋಷಕರನ್ನು ಪೊಲೀಸರು ಠಾಣೆಗೆ ಕರೆದೊಯ್ದರೆಂದು ಕೋಪಗೊಂಡ ಯುವಕ ತನ್ನ 31 ವರ್ಷದ ಸಹೋದರಿಗೆ ಬೆಂಕಿ ಹಚ್ಚಿಕೊಳ್ಳುವಂತೆ ಮನವೊಲಿಸಿದ್ದು, ಸಹೋದರನ ಮಾತನ್ನು ಕೇಳಿದ ಆಕೆ ಆತ್ಮಹತ್ಯೆಗೆ ಯತ್ನಿಸಿದ್ದಾಳೆ.

ಸರೋಜ್ ಯಾದವ್ ಎಂಬಾಕೆ ಪೆಟ್ರೋಲ್ ಸುರಿದುಕೊಂಡು ಬೆಂಕಿ ಹಚ್ಚಿಕೊಂಡ ಯುವತಿ. ಆಕೆಯ ಸಹೋದರ ಸಂಜೀವ್ ಯಾದವ್ ಸಹೋದರಿಯ ಪ್ರಾಣ ಉಳಿಸುವ ಬದಲು ಸನಿಹದಲ್ಲಿ ನಿಂತು ವಿಡಿಯೋ ಮಾಡುವುದನ್ನೇ ಮುಂದುವರೆಸಿದ್ದಾನೆ. ಘಟನೆಯ ನಂತರ ಭಾನುವಾರ ಸಾಮಾಜಿಕ ಮಾಧ್ಯಮದಲ್ಲಿಯೂ ವಿಡಿಯೋ ಹಂಚಿಕೊಂಡಿದ್ದಾನೆ. ಘಟನೆ ದೃಶ್ಯ ಸಿಸಿಟಿವಿಯಲ್ಲಿಯೂ ಸೆರೆಯಾಗಿದೆ.

ಸ್ಥಳೀಯರು ನೀಡಿದ ಮಾಹಿತಿ ಪ್ರಕಾರ, "ಸಂತ್ರಸ್ತೆ ಸರೋಜ್ ತನ್ನ ಸಹೋದರನ ಮಾತು ಕೇಳಿ ದುಡುಕಿನ ನಿರ್ಧಾರ ತೆಗೆದುಕೊಂಡಿದ್ದಾಳೆ" ಎಂದರು. ನೆರೆಹೊರೆಯವರಾದ ಪವನ್ ಗುಪ್ತಾ ಅವರ ಪತ್ನಿ ಪ್ರತೀಕ್ಷಾ ಇತ್ತೀಚೆಗೆ ಕೌನ್ಸಿಲರ್ ಆಗಿ ಆಯ್ಕೆಯಾಗಿದ್ದರು. ಚುನಾವಣೆಯಲ್ಲಿ ತನ್ನ ಹೆಂಡತಿ ಜಯಗಳಿಸಿದ ನಂತರ ಪವನ್‌, ನನಗೆ "ಬೆದರಿಕೆ" ಹಾಕುತ್ತಿದ್ದ ಎಂದು ಸಂತ್ರಸ್ತೆ ಆರೋಪಿಸಿದ್ದಾರೆ. ಮಹಿಳೆಗೆ ತೀವ್ರ ಸುಟ್ಟ ಗಾಯಗಳಾಗಿದ್ದು, ಆಕೆಯ ಸ್ಥಿತಿ ಚಿಂತಾಜನಕವಾಗಿದೆ ಎಂದು ಹೇಳಲಾಗಿದೆ.

ಭಾನುವಾರ ಸಂತ್ರಸ್ತೆಯ ತಾಯಿ ಊರ್ಮಿಳಾ ಅವರು ಪವನ್ ಜೊತೆ ಜಗಳವಾಡಿದ್ದಾರೆ. ಈ ಕುರಿತು ಪೊಲೀಸರಿಗೆ ವಿಷಯ ತಿಳಿಸಲಾಗಿದ್ದು, ಅವರನ್ನು ಠಾಣೆಗೆ ಕರೆದುಕೊಂಡು ಹೋಗಿದ್ದಾರೆ. "ಪೊಲೀಸರು ನನ್ನನ್ನು ಮತ್ತು ನನ್ನ ಪತಿಯನ್ನು ಠಾಣೆಗೆ ಕರೆದೊಯ್ದಾಗ, ನನ್ನ ಮಗಳು ಅಸಮಾಧಾನಗೊಂಡು ಆತ್ಮಹತ್ಯೆಗೆ ಯತ್ನಿಸಿದ್ದಾಳೆ" ಎಂದು ಊರ್ಮಿಳಾ ಹೇಳಿದ್ದಾರೆ.

ಇದನ್ನೂ ಓದಿ : ಬೆಲ್ಲ ತಯಾರಿಕಾ ಘಟಕದ ಶೆಡ್‌ಗೆ ಬೆಂಕಿ: ನಾಲ್ವರು ವಲಸೆ ಕಾರ್ಮಿಕರಿಗೆ ಗಾಯ

ಈ ಕುರಿತು ಪ್ರತಿಕ್ರಿಯೆ ನೀಡಿದ ಶಹಜಹಾನ್‌ಪುರದ ಹಿರಿಯ ಪೊಲೀಸ್ ವರಿಷ್ಠಾಧಿಕಾರಿ (ಎಸ್‌ಎಸ್‌ಪಿ) ಎಸ್‌.ಆನಂದ್, ಸಂತ್ರಸ್ತ ಮಹಿಳೆಗೆ ಕುತ್ತಿಗೆಯಿಂದ ಸೊಂಟದವರೆಗೆ ಸುಟ್ಟ ಗಾಯಗಳಾಗಿದ್ದು, ಆಕೆಯ ಸ್ಥಿತಿ ಚಿಂತಾಜನಕವಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ. ಬೈಕ್‌ನಿಂದ ಪೆಟ್ರೋಲ್ ತೆಗೆದಿರುವುದು ಕಂಡುಬಂದಿದೆ. ನಂತರ ವಿಡಿಯೋವನ್ನು ಸಂತ್ರಸ್ತೆಯ ಸಹೋದರ ಚಿತ್ರೀಕರಿಸಿದ್ದಾನೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಿಸಿಟಿವಿ ದೃಶ್ಯಾವಳಿಗಳನ್ನು ಸಹ ನಾವು ಪಡೆದುಕೊಂಡಿದ್ದೇವೆ. ವಿಡಿಯೋದಲ್ಲಿ ಸಹೋದರಿಯ ಮೇಲೆ ಯುವಕ ಒತ್ತಡ ಹೇರುತ್ತಿರುವಂತೆ ತೋರುತ್ತಿದೆ. ಜೊತೆಗೆ, ಪವನ್ ಗುಪ್ತಾ ಕುರಿತು ಸಹ ತನಿಖೆ ನಡೆಸುತ್ತಿದ್ದೇವೆ" ಎಂದಿದ್ದಾರೆ.

ಇದನ್ನೂ ಓದಿ : ವ್ಯಾಪಾರದಲ್ಲಿ ನಷ್ಟವಾಗಿದ್ದಕ್ಕೆ ಬಡ ಯುವತಿಯರ ಕರೆ ತಂದು ನಗ್ನ ಪೂಜೆ, ಲೈಂಗಿಕ ದೌರ್ಜನ್ಯ!

ನಗರದ ಆರ್.ಸಿ.ಮಿಷನ್ ಪೊಲೀಸ್ ಠಾಣಾ ವ್ಯಾಪ್ತಿಯ ರೆಟಿ ಕಾಲೋನಿಯಲ್ಲಿ ಘಟನೆ ನಡೆದಿದ್ದು, ಸುಂದರ್ ಲಾಲ್ ಮತ್ತು ಊರ್ಮಿಳಾ ದಂಪತಿಗೆ ಪುತ್ರಿ ಸರೋಜ ಸೇರಿದಂತೆ ಐದು ಮಕ್ಕಳು. ಇವರಲ್ಲಿ ಇಬ್ಬರು ಹೆಣ್ಣುಮಕ್ಕಳಿಗೆ ಮದುವೆಯಾಗಿದ್ದು, ಉಳಿದ ಮೂವರು ಮಕ್ಕಳೊಂದಿಗೆ ದಂಪತಿ ವಾಸವಿದ್ದಾರೆ.

ಇದನ್ನೂ ಓದಿ : ಗಾಜಿನ ಬಾಟಲಿ ಒಡೆದು ಮುಖಕ್ಕೆ ಇರಿದ ಸಹ ಪ್ರಯಾಣಿಕ- ವಿಡಿಯೋ