ಪತ್ತನಂತಿಟ್ಟ(ಕೇರಳ): ವಿಶ್ವಪ್ರಸಿದ್ಧ ದೇವಸ್ಥಾನಗಳಲ್ಲಿ ಶಬರಿಮಲೆ ಅಯ್ಯಪ್ಪ ಸ್ವಾಮಿ ದೇಗುಲವೂ ಒಂದು. ಪ್ರತಿ ವರ್ಷ ಲಕ್ಷಾಂತರ ಭಕ್ತರು ಇಲ್ಲಿಗೆ ಭೇಟಿ ನೀಡಿ, ದೇವರ ದರ್ಶನ ಪಡೆದು ಪುನೀತರಾಗುತ್ತಾರೆ.
ಇಲ್ಲಿಗೆ ಭಕ್ತರು ಬಸ್, ರೈಲು ಹಾಗೂ ಇನ್ನಿತರ ವಾಹನ ಸೌಲಭ್ಯದೊಂದಿಗೆ ಬರುತ್ತಾರೆ. ಆದರೆ, ಇಲ್ಲೊಬ್ಬ ಅಯ್ಯಪ್ಪನ ಪರಮ ಭಕ್ತ, ವಿಶೇಷ ಚೇತನ ವ್ಯಕ್ತಿ ಸುಮಾರು 750 ಕಿಲೋ ಮೀಟರ್ ನಡೆದುಕೊಂಡೇ ಬಂದು ಭಕ್ತಿಯ ಪರಾಕಾಷ್ಠೆ ಮರೆದಿದ್ದಾರೆ.
ಆಂಧ್ರಪ್ರದೇಶ ನೆಲ್ಲೂರಿನ ಅಕರಪಕ್ಕ ಸುರೇಶ್ ಎಂಬವರು ತಮ್ಮ ಹುಟ್ಟೂರಿನಿಂದ ಕೇರಳದ ಅಯ್ಯಪ್ಪನ ಸನ್ನಿಧಿಯವರೆಗೆ ಅಂದಾಜು 750 ಕಿಲೋ ಮೀಟರ್ ನಡೆದುಕೊಂಡು ಬಂದಿದ್ದಾರೆ.
ಇದನ್ನೂ ಓದಿ: ಮಹಾರಾಷ್ಟ್ರ: ಚಲಿಸುತ್ತಿದ್ದ ರೈಲಿನಿಂದ ಕೆಳಗೆ ಬಿದ್ದು ತಾಯಿ, ಮಗು ದುರ್ಮರಣ
ಅಖಿಲ ಭಾರತ ಅಯ್ಯಪ್ಪ ದೀಕ್ಷಾ ಪ್ರಚಾರ ಸಭೆಯ ಸದಸ್ಯರಾಗಿರುವ ಸುರೇಶ್, ಕಳೆದ 105 ದಿನಗಳಿಂದ 750 ಕಿಲೋ ಮೀಟರ್ ದೂರ ಕ್ರಮಿಸಿದ್ದು, ಶಬರಿಮಲೆ ದೇವಸ್ಥಾನ ತಲುಪಿದ್ದಾರೆ. ವಿಶೇಷ ಚೇತನ ವ್ಯಕ್ತಿಯಾಗಿರುವ ಇವರು, ನಡೆದುಕೊಂಡು ಬರಲು ಊರುಗೋಲು ಬಳಸಿದ್ದಾರೆ.
ಕಳೆದ ಸೆಪ್ಟೆಂಬರ್ 20ರಂದು ಆಂಧ್ರಪ್ರದೇಶದ ನೆಲ್ಲೂರಿನಿಂದ ಇವರು ಕಾಲ್ನಡಿಗೆ ಆರಂಭಿಸಿದ್ದರು. ಇದೀಗ ಅಯ್ಯಪ್ಪ ಸ್ವಾಮಿ ಸನ್ನಿಧಾನಕ್ಕೆ ಆಗಮಿಸಿದ್ದು ದೇವಸ್ಥಾನದಲ್ಲಿ ವಿಶೇಷ ದರ್ಶನಕ್ಕೆ ವ್ಯವಸ್ಥೆ ಕಲ್ಪಿಸಲಾಗಿತ್ತು.
