ಚೆನ್ನೈ: ಖ್ಯಾತ ನಟ ಕಮಲ್ ಹಾಸನ್ ಅವರ ಮನೆಯ ಗೋಡೆಗೆ ಕೋವಿಡ್-19 'ಹೋಂ ಕ್ವಾರಂಟೈನ್' ಸ್ಟಿಕ್ಕರ್ ಅಂಟಿಸಿದ್ದು ಹಾಗೂ ನಂತರ ತೆಗೆದಿದ್ದು ಸಾಕಷ್ಟು ವಿವಾದಕ್ಕೆ ಕಾರಣವಾಗಿದೆ.
ಗ್ರೇಟರ್ ಚೆನ್ನೈ ಮಹಾನಗರಪಾಲಿಕೆ ಸಿಬ್ಬಂದಿ ಕಮಲ್ ಹಾಸನ್ ಮನೆಯ ಗೋಡೆಗೆ 'ಹೋಂ ಕ್ವಾರಂಟೈನ್' ಸ್ಟಿಕ್ಕರ್ ಅಂಟಿಸಿದ್ದರು. ಆದರೆ ಕೆಲ ಗಂಟೆಗಳ ನಂತರ ಅವರೇ ಹೋಗಿ ಸ್ಟಿಕ್ಕರ್ ತೆಗೆದಿದ್ದಾರೆ. ತಿಳಿಯದೆ ತಪ್ಪಾಗಿ ಸ್ಟಿಕ್ಕರ್ ಅಂಟಿಸಲಾಗಿತ್ತು ಎಂದು ಪಾಲಿಕೆ ಈ ಸಂದರ್ಭದಲ್ಲಿ ಸ್ಪಷ್ಟೀಕರಣ ನೀಡಿದೆ. ಮಹಾನಗರ ಪಾಲಿಕೆಯ ಈ ಕ್ರಮ ಈಗ ವಿವಾದಕ್ಕೆ ಕಾರಣವಾಗಿದೆ.
ಸ್ಟಿಕ್ಕರ್ ಅಂಟಿಸುವ ಮೂಲಕ ಸರ್ಕಾರ ಕಮಲ್ ಹಾಸನ್ಗೆ ಕಿರುಕುಳ ನೀಡುತ್ತಿದೆ ಎಂದು ಮಕ್ಕಳ್ ನೀಧಿ ಮೈಯಮ್ ಪಕ್ಷದ ವಕ್ತಾರ ಮುರಲಿ ಅಪ್ಪಾಸ್ ಆರೋಪಿಸಿದ್ದಾರೆ. ಕಮಲ್ ಕಳೆದ ಜನೇವರಿಯಿಂದ ಭಾರತದಲ್ಲೇ ಇದ್ದಾರೆ. ಪ್ರಸ್ತುತ ಕಮಲ್ ಅವರ ಈ ಮನೆ ಪಕ್ಷದ ಕಚೇರಿಯಾಗಿದೆ. ಕಚೇರಿ ಎದುರು ಭದ್ರತಾ ಸಿಬ್ಬಂದಿ ಇದ್ದರೂ ಅವರಿಗೆ ಒಂದು ಮಾತೂ ಕೇಳದೆ ರಾತ್ರಿ ಸಮಯದಲ್ಲಿ ಸ್ಟಿಕ್ಕರ್ ಅಂಟಿಸಲಾಗಿದೆ ಎಂದು ಮುರಲಿ ಅಪ್ಪಾಸ್ ಹೇಳಿದ್ದಾರೆ.
ಈ ಕುರಿತು ಸ್ಪಷ್ಟೀಕರಣ ನೀಡಿರುವ ಕಮಲ್ ಹಾಸನ್, 'ನನ್ನನ್ನು ಕ್ವಾರಂಟೈನ್ನಲ್ಲಿ ಇರಿಸಲಾಗಿದೆ ಎಂಬುದು ಸುಳ್ಳು. ಸುರಕ್ಷತೆಯ ದೃಷ್ಟಿಯಿಂದ ನಾನಾಗಿಯೇ ಸಾಮಾಜಿಕ ಅಂತರ ಕಾಯ್ದುಕೊಂಡಿದ್ದೇನೆ. ಜನತೆಗೂ ಅದನ್ನೇ ಮಾಡುವಂತೆ ತಿಳಿಸಿದ್ದೇನೆ.' ಎಂದಿದ್ದಾರೆ.
'ನಮ್ಮ ಸಂಪೂರ್ಣ ಕುಟುಂಬ ಸ್ವಇಚ್ಛೆಯಿಂದ ಪ್ರತ್ಯೇಕವಾಸದಲ್ಲಿದೆ. ಅಮ್ಮ (ನಟಿ ಸಾರಿಕಾ) ಮುಂಬೈನಲ್ಲಿ ಬೇರೆ ಅಪಾರ್ಟ್ಮೆಂಟ್ನಲ್ಲಿದ್ದಾರೆ. ಅಪ್ಪ (ಕಮಲ್) ಮತ್ತು ಅಕ್ಷರಾ (ತಂಗಿ) ಇಬ್ಬರೂ ಚೆನ್ನೈನಲ್ಲಿದ್ದರೂ ಬೇರೆ ಬೇರೆ ಮನೆಗಳಲ್ಲಿದ್ದಾರೆ. ಎಲ್ಲರೂ ನಮ್ಮದೇ ಆದ ಪ್ರತ್ಯೇಕ ಪ್ರಯಾಣದ ಶೈಲಿಯನ್ನು ಹೊಂದಿರುವುದರಿಂದ ಎಲ್ಲರೂ ಒಂದೇ ಕಡೆ ಪ್ರತ್ಯೇಕವಾಸದಲ್ಲಿ ಇರುವುದು ಸೂಕ್ತವಾಗಲಾರದು. ಜನತೆ ಸಹ ಇದೇ ರೀತಿ ಇರಬೇಕು' ಎಂದು ಕಮಲ್ ಪುತ್ರಿ ಶೃತಿ ಹಾಸನ್ ತಿಳಿಸಿದ್ದಾರೆ.
