ಹೈದರಾಬಾದ್: ಫಿಟ್ ಇಂಡಿಯಾ ಅಂಭಿಯಾನ ಒಂದು ವರ್ಷ ಪೂರೈಕೆ ಮಾಡಿದ್ದು, ಈ ಹಿನ್ನೆಲೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಮೊದಲ ವಾರ್ಷಿಕೋತ್ಸವ ಸಮಾರಂಭದಲ್ಲಿ ಭಾಗಿಯಾಗಿ ಅನೇಕ ದಿಗ್ಗಜರೊಂದಿಗೆ ಸಂವಾದ ನಡೆಸಿದರು.
ಬೆಳಗ್ಗೆ 12 ಗಂಟೆಗೆ ಆರಂಭಗೊಂಡ ಸಂವಾದದಲ್ಲಿ ಪ್ರಮುಖವಾಗಿ ಟೀಂ ಇಂಡಿಯಾ ಕ್ಯಾಪ್ಟನ್ ವಿರಾಟ್ ಕೊಹ್ಲಿ, ಮಿಲಿಂದ್ ಸೋಮನ್, ರುಜುತಾ ದಿವೇಕರ್, ಸ್ವಾಮಿ ಶಿವಾಧ್ಯಾನಂ ಸರಸ್ವತಿ ಸೇರಿ ಅನೇಕರು ಭಾಗಿಯಾಗಿದ್ದರು. ಈ ವೇಳೆ, ಪ್ರಧಾನಿ ನರೇಂದ್ರ ಮೋದಿ ತಮ್ಮ ಫಿಟ್ನೆಸ್ ಸಿಕ್ರೆಟ್ ಹಂಚಿಕೊಂಡರು.
ಇದೇ ವೇಳೆ ಟೀಂ ಇಂಡಿಯಾ ಕ್ಯಾಪ್ಟನ್ ವಿರಾಟ್ ಕೊಹ್ಲಿ ಜತೆ ಮಾತನಾಡಿದ ಪ್ರಧಾನಿ ನರೇಂದ್ರ ಮೋದಿ, ನಿಮಗೆ ಸುಸ್ತಾಗುತ್ತಾ ಎಂದು ಪ್ರಶ್ನೆ ಮಾಡಿದ್ದಾರೆ. ಇದಕ್ಕೆ ಉತ್ತರ ನೀಡಿದ ವಿರಾಟ್, ಪ್ರತಿಯೊಬ್ಬರೂ ತಮಗೆ ಧಣಿವಾಗಿದೆ ಎಂದು ಅಂದುಕೊಳ್ಳುತ್ತಾರೆ. ಆದರೆ, ನಮ್ಮ ಜೀವನ ಶೈಲಿ ಉತ್ತಮವಾಗಿದ್ದರೆ ಮತ್ತು ನಾವು ನಿತ್ಯ ಕೆಲಸ ಮಾಡುತ್ತಿದ್ದರೆ, ಉತ್ಸಾಹದಿಂದ ಇರುತ್ತೇವೆ. ಇವೆಲ್ಲವೂ ವ್ಯಕ್ತಿಯ ಜೀವನಶೈಲಿ ಮೇಲೆ ಅವಲಂಬಿತವಾಗಿರುತ್ತವೆ ಎಂದಿದ್ದಾರೆ.
ತಮ್ಮ ಫಿಟ್ನೆಸ್ ರಹಸ್ಯ ಹಂಚಿಕೊಂಡ ಕೊಹ್ಲಿ, ನಮ್ಮ ಉದ್ದೇಶಗಳು ಸರಿಯಾಗಿರಬೇಕು. ಅದರ ಪ್ರಕಾರವೇ ನಮ್ಮಿಂದ ಫಲಿತಾಂಶ ಹೊರಬರುತ್ತವೆ ಎಂದು ತಿಳಿಸಿದ್ದಾರೆ. ಇಂಡಿಯನ್ ಪ್ರೀಮಿಯರ್ ಲೀಗ್ನ 13ನೇ ಆವೃತ್ತಿಯಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಮುನ್ನಡೆಸುತ್ತಿರುವ 31 ವರ್ಷದ ಕ್ರಿಕೆಟಿಗ ಕೊಹ್ಲಿ, ತಮ್ಮ ಕ್ರಿಕೆಟ್ನಲ್ಲಿ ನಡೆಸುವ ಯೋ-ಯೋ ಪರೀಕ್ಷೆ ಕುರಿತು ಮಾಹಿತಿ ಹಂಚಿಕೊಂಡಿದ್ದಾರೆ.
ಫಿಟ್ನೆಸ್ ವಿಷಯದಲ್ಲಿ ಇದು ಬಹಳ ಮುಖ್ಯವಾದ ಪರೀಕ್ಷೆ. ಇತರ ತಂಡಗಳಿಗೆ ಹೋಲಿಕೆ ಮಾಡಿದಾಗ ನಮ್ಮ ಫಿಟ್ನೆಸ್ ಮಟ್ಟ ಕಡಿಮೆಯಾಗಿದೆ. ಯೋ-ಯೋ ಪರೀಕ್ಷೆ ನೀಡಿದ ಮೊದಲ ವ್ಯಕ್ತಿ ನಾನು. ಇದರಲ್ಲಿ ವಿಫಲವಾದರೆ ಆಯ್ಕೆ ಮಾಡಲು ಕೂಡ ಆಗಲ್ಲ. ಟೆಸ್ಟ್ ಪಂದ್ಯದ ವೇಳೆ ಆಟಗಾರರು 4ರಿಂದ 5 ದಿನ ಮೈದಾನದಲ್ಲಿರಬೇಕಾಗುತ್ತದೆ. ಈ ವೇಳೆ ನಮಗೆ ಫಿಟ್ನೆಸ್ ಮಟ್ಟ ಉತ್ತಮವಾಗಿರಬೇಕು ಎಂದು ಕೊಹ್ಲಿ ಹೇಳಿದ್ದಾರೆ.
ಇದೇ ವೇಳೆ ವಿರಾಟ್ ಕೊಹ್ಲಿ ಪತ್ನಿ ಅನುಷ್ಕಾ ಶರ್ಮಾ ಅವರ ಆರೋಗ್ಯ ಉತ್ತಮವಾಗಿರಲಿ ಎಂದು ನಮೋ ಹಾರೈಸಿದರು. ಈ ದಂಪತಿ ಮೊದಲ ಮಗುವಿನ ನಿರೀಕ್ಷೆಯಲ್ಲಿದ್ದಾರೆ. ಜತೆಗೆ ಐಪಿಎಲ್ ವೇಳಾಪಟ್ಟಿ ಬಿಡುವಿಲ್ಲದ ಸಮಯದಲ್ಲೂ ಮಾತನಾಡಲು ಸಮಯ ತೆಗೆದುಕೊಂಡಿದ್ದಕ್ಕಾಗಿ ವಿರಾಟ್ಗೆ ಮೋದಿ ಧನ್ಯವಾದ ಅರ್ಪಿಸಿದ್ದಾರೆ.
ಯಾವುದೇ ವ್ಯಕ್ತಿ ತನ್ನ ದೇಹ ಸದೃಢವಾಗಿಟ್ಟುಕೊಳ್ಳುವುದು ಅತಿ ಮುಖ್ಯ. ಆರೋಗ್ಯವನ್ನ ಕೆಡಿಸಿಕೊಳ್ಳಬೇಡಿ. ಆದರೆ ತೂಕವನ್ನ ಕಡಿಮೆ ಮಾಡಿಕೊಳ್ಳಿ ಎಂದು ಪ್ರಧಾನಿ ಮನವಿ ಮಾಡಿದ್ದಾರೆ.
