UKSSSC पेपर लीक केस क मास्टरमाइंड क सरेंडर: सबसे पैली बात करला उत्तराखंड क सबसे बड़ा पेपर लीक मामला क. उत्तराखंड अधीनस्थ सेवा चयन आयोग (Uttarakhand Subordinate Service Selection Commission) मा ह्वाई परीक्षा पेपर लीक मा मास्टरमाइंड केंद्रपाल न यूपी क बिजनौर कोर्ट मा सरेंडर कौरी च. सीजेएम कोर्ट न आरोपी कु जेल भेज देई. पेपर लीक मामले का मास्टरमाइंड केंद्रपाल धामपुर मा टीचर्स कॉलोनी मा रेंदू छै. बतै द्यां कि उत्तराखंड अधीनस्थ सेवा चयन आयोग पेपर लीक केस में एसटीएफ न अबी तक 23 आरोपियों तैं गिरफ्तार कौरी च जबकि 60 नकलचियों की बी पैचाण ह्वै चुकीं च.
भाजपा क नई टीम कु ऐलान: उत्तराखंड भाजपा (Uttarakhand BJP) क प्रदेश अध्यक्ष महेंद्र भट्ट न अपणी टीम चुनी ल्याई च. महेंद्र भट्ट न टीम मा युवाऊं कु साथ अनुभवी लोगूं तैं मौका देई च. शशांक रावत तैं भाजपा युवा मोर्चा कु प्रदेश अध्यक्ष बणै गै च, जबकि भाजपा महिला मोर्चा की प्रदेश अध्यक्ष आशा नौटियाल कु बणै च. जोगेंद्र पुंडीर कु भाजपा किसान मोर्चा कु प्रदेश अध्यक्ष, राकेश गिरी कु भाजपा ओबीसी मोर्चा प्रदेश अध्यक्ष, समीर आर्य तैं अनुसूचित जाति मोर्चा प्रदेश अध्यक्ष अर इंतजार हुसैन तैं भाजपा अल्पसंख्यक मोर्चा कु प्रदेश अध्यक्ष बणै ग्यै च.
ऋषिकेश-कर्णप्रयाग रेलवे लाइन मा मीली बड़ी कामयाबी: पहाड़ क लोगूं का रेल देखण कु सपणा जल्द पूरू होण वालु च. ऋषिकेश-कर्णप्रयाग (Rishikesh Karnaprayag line) क 125 किमी लंबी रेलवे लाइन पन पैली बार द्वी किमी सुरंग आर-पार ह्वाई च. ई सुरंग रुद्रप्रयाग सी सात किमी दूर नरकोटा अर खांखरा क बीच मा बनै जाणी च. ये कार्य तैं ऋषिकेश-कर्णप्रयाग रेलवे लाइन कु पैला कामयाबी माणी जाणी च.
बॉबी कटारिया न फिर देई चकमा: देहरादून-मसूरी मार्ग पन ट्रैफिक रोकी कन सराआम सड़कों पन शराब पीण अर अमर्यादित हरकत कन कु बाद से चर्चाओं मा आई बॉबी कटारिया (Influencer Bobby Kataria) न देहरादून पुलिस कु चकमा देई च. कटारिया न एक दिन पैली ही देहरादून सीजेएम कोर्ट मा सरेंडर कन की अर्जी दाखिल कौरी छै, पर ऊ सरेंडर कन पौंची नी. वखी, सीजेएम कोर्ट परिसर कु भैर पुलिस वै कु इंतजार मा खड़ी रैई. अब देहरादून पुलिस बॉबी कटारिया की गिरफ्तारी कु लेकी वैका ठिकानों पन दबिश देली.
रामदेव की ह्वाई खिंचाई: सुप्रीम कोर्ट न मंगलवार कु एलोपैथिक डॉक्टरों की आलोचना कन कु लेकी योग गुरू बाबा रामदेव (Yoga Guru Ramdev) की खिंचाई कौरी अर ऊं तै यन क्वी बी बयान देण कु मना कौरी. सीजेआई एनवी रमना, जस्टिस हिमा कोहली अर जस्टिस सीटी रविकुमार की बेंच इंडियन मेडिकल एसोसिएशन की याचिका पन सुनवाई करनी छै जैमा कोविड वैक्सीन अर आधुनिक चिकित्सा कु खिलाफ चलै जाणु अभियान कु चुनौती दे ग्याई च. अदालत न मामले मा केंद्र सरकार कु नोटिस जारी कौरी च.
डेढ़ साल बाद बी मिलणा लग्यां शव: चमोली जिले मा 7 फरवरी 2021 कु दिन आई रैणी आपदा (Chamoli Raini Disaster) क डेढ़ साल बाद बी शवों कु मिलणा जारी च. ये कड़ी मा तपोवन स्थित इंटर टनल मा आज एक मानव अंग बरामद ह्वाई च. मानव अंग कु टनल बिटीं भैर निकाली कन वैका शिनाख्त क कोशिश ह्वाणी च. फिलहाल, मानव अंगों तैं सीआईएसएफ गेट क मोर्चरी मा रखी ग्याई च. येका साथ ही अबी तक कुल 90 शव मिली ग्यै छन.
फरार बीजेपी नेता कु बेटा गिरफ्तार: रुड़की क इमरान हत्याकांड मा फरार बीजेपी नेता अशोक वर्मा क बेटा रिजुल वर्मा तैं पुलिस न वैका घौर बिटीं गिरफ्तार कौरी. रिजुल तैं पुलिस न 120बी कु मुल्जिम बनै च. वखी, अशोक वर्मा अभी फरार चलणा च. बता द्यां कि रुड़की क गंगनहर कोतवाली क्षेत्र क गणेशपुर मा 27 जुलाई का दिन भाजपा नेता अशोक वर्मा की बिल्डिंग से गिरी कन इमरान की संदिग्ध परिस्थितियों मा मौत ह्वै गै छै. इमरान क परिजनों न भाजपा नेता अशोक वर्मा अर ऊं का तीन साथियों पन हत्या कन क आरोप लगै कन नामजद तहरीर देई छै.
असली पुलिस क हत्था चड़ी फर्जी पुलिसवालु: फर्जी पुलिसवालु बनी कन स्पा सेंटर मा अवैध वसूली कन वालु आरोपी हरीश गिरि तैं देहरादून पुलिस न 24 घंटे क भीतर श्यामपुर बिटीं दबोच लेई. आरोपी न देहरादून क जीएमएस रोड स्थित एक स्पा सेंटर मा महिलाओं दगड़ी बदसलूकी कौरी छै. बतैं द्यां कि न्यू पटेलनगर विशाल मेगा मार्ट निवासी एक महिला न पुलिस तैं बतै छै कि 20 अगस्त कु आरोपी न पुलिसवालु बनी कन ऊं का स्पा सेंटर ब्लू स्टार पन काम कन वालु लड़का-लड़कियों दगड़ी गाली-गलौज कौरी थै. आरोपी न पीड़िता कु जबरदस्ती अपणा दगड़ी स्कूटी मा बैठाई थै अर छेड़खानी कौरी थै. वैका बाद ₹8500 छीनकर फरार ह्वै ग्ये छै.
झाड़ियों में मिली बच्ची कु शव: हरिद्वार क सिडकुल थाना क्षेत्र मा झाड़ियों मा द्वी साल की मासूम बच्ची का शव मीली. बच्ची क धारदार हथियार से गला रेती कन हत्या की ग्याई च. पुलिस न शव तैं पोस्टमार्टम कु भेजी. अबी बच्ची की शिनाख्त त नी ह्वा पाई च पर पुलिस कु मौका पन कुछ अहम सुराग हाथ लगी छन. वखी, लोगों से मिली जानकारी के मुताबिक घटनास्थल पर एक संदिग्ध व्यक्ति तैं देखी ग्यै थै, जैका पुलिस अब पता लगाण की कोशिश कनी च.
नाबालिग छात्रा कु अपहरण: हरिद्वार जिले कु लक्सर कोतवाली क्षेत्र क एक गांव मा नाबालिग छात्रा क अपहरण का मामला समणि आई च. बतै जाणु च कि छात्रा घर बिटीं ट्यूशन कु निकली छै, पर ट्यूशन नी पौंची. नाबालिग क पिता न जॉनी और अंशुल नाम क द्वी युवकों पन अपहरण कु आरोप लगाई च, साथ ही दोनों क खिलाफ मुकदमा दर्ज करै च. पुलिस न दोनों युवकों क खिलाफ केस दर्ज कर लेई.
अमेरिकी नागरिक क सकुशल रेस्क्यू: उत्तरकाशी क डोडीताल से 20 अगस्त बिटीं लापता 62 वर्षीय अमेरिकी नागरिक राजीव राव कु उत्तराखंड एसडीआरएफ की टीम न 72 घंटा बाद सकुशल रेस्क्यू कौरी. अमेरिका क रहण वाल राजीव राव 17 अगस्त कु गणेशपुर बिटीं बासुकी नाग देवता क डोली कु साथ डोडीताल ग्याई थै अर रास्ता भटकन कु कारण गलत दिशा मा चल ग्यै छै.
मौसम विभाग क येलो अलर्ट: एक बार फिर से उत्तराखंड मौसम विभाग न प्रदेश मा येलो अलर्ट जारी (Yellow alert in Uttarakhand) कौरी च. मौसम विभाग ने चेतावनी देई कि खासकर देहरादून, उत्तरकाशी, टिहरी, चमोली अर पिथौरागढ़ जिला मा कई स्थानों पन गरज क साथ भारी बारिश ह्वै सकदी. कखी गर्जन के साथ आकाशीय बिजली चमकण अर तीव्र बौछार पड़ सकदी.
कोरोना क 166 नया मरीज: आखिर मा कोरोना की बात करदां. उत्तराखंड मा बीता 24 घंटा क भीतर कोरोना क 166 नया मरीज मिली छन, जबकि 180 मरीजों ठीक ह्वै गेन. येका साथ ही प्रदेश मा एक्टिव केसों क संख्या 886 पौंची ग्यै च. राहत की बात च कि बीता 24 घंटा मा क्वी मरीज की मौत नी ह्वाई. जिलेवार बात करां च, पिछला 24 घंटा मा देहरादून मा 60 कोरोना केस, अल्मोड़ा मा 4, चंपावत मा 1, हरिद्वार मा 11, नैनीताल मा 48, पौड़ी मा 2, पिथौरागढ़ मा 6, रुद्रप्रयाग मा 19, टिहरी मा 2 अर उधम सिंह नगर मा 13 मरीज मीली छन.
