1. हेस्को पौंचिकि सीएम धामी ना डॉ. अनिल जोशी से करि मुलाकात: मुख्यमंत्री पुष्कर सिंह धामी ना आज सुबेर हिमालयी पर्यावरण अध्ययन एवं संरक्षण संगठन (हेस्को) पहुंचिकी पद्मभूषण डॉ. अनिल जोशी से करि मुलाकात, ये दौरान द्वियो का बीच पर्यावरण सरंक्षण थै लेकि ह्वे चर्चा, वखि हेस्को ग्राम मा मुख्यमंत्री ना संस्था की तरफ बटि किये जाणा कार्यों कू करि अवलोकन. सीएम धामी ना बोली- होस्को का संस्थापक डॉ. अनिल जोशी पर्यावरणविद् हुणा का दगणि-दगणि छिन समाजसेवी भी.
2. पेशावर कांड की 92वीं बरसी का मौका पर क्रांति मेला कू आयोजन: पेशावर कांड की 92वीं बरसी पर वीर चंद्र सिंह गढ़वाली का पैतृक गौं पीठसैंण मा किये ग्या भव्य क्रांति मेला कू आयोजन, पेशवार कांड का नायक वीर चंद्र सिंह गढ़वाली की स्मृति मा आयोजित क्रांति मेला मा सीएम पुष्कर सिंह धामी ना करि शिरकत, स्वर्गीय वीर चन्द्र सिंह गढ़वाली की मूर्ति पर पुष्प अर्पित कैरि सीएम धामी ना ऊथै करि नमन, क्रांति मेला मा भारी तादाद मा पहुंचिन ग्रामीण.
3. चारधाम यात्रा का दौरान जाम से मिललि निजात: चारधाम यात्रा का दौरान वीकेंड मा ऋषिकेश मा लगण वला जाम से स्कूली बच्चों थै निजात दिलाण का वास्ता कैबिनेट मंत्री प्रेमचंद अग्रवाल ना जिलाधिकारी देहरादून थै देनि निर्देश, कैबिनेट मंत्री प्रेमचंद अग्रवाल ना जिलाधिकारी थै चारधाम यात्रा का दौरान हर शनिवार विद्यालयों थै बंद किये जाणा कू दे आदेश. उत्तराखंड अभिभावक संघर्ष महांसंघ ना कैबिनेट मंत्री से करि छाई ऋषिकेश मा लगणा वाल जाम से निजात दिलाणा की मांग.
4. चारधाम यात्रा पर आण वला श्रद्धालुओं थै मास्क लगाण अनिवार्य: उत्तराखंड मा चारधाम यात्रा शुरू हुण मा 10 दिनों से कम समय बच्यु च, 3 मई से प्रदेश मा चारधाम यात्रा की शुरुआत ह्वे जालि, यन मा पर्यटन मंत्री सतपाल महाराज चारधाम यात्रा की तैयारियों थै लेकि लगातार समीक्षा बैठक कना छिन, वखि ये मौका पर पर्यटन मंत्री ना बोलि- देश मा फिर बढ़ना छिन कोरोना का मामला, यन मा चारधाम यात्रा पर आण वला श्रद्धालुओं खुण मास्क लगाण होलु अनिवार्य.
5. श्रीनगर मेडिकल कॉलेज मा खुली न्यूरोलॉजी की ओपीडी: गढ़वाल मंडल का क्षेत्रवासियों खुण अच्छी खबर च, अब न्यूरो संबंधी रोगियों थे देहरादून या दिल्ली का चक्कर नि लगाण पड़ला, श्रीनगर मेडिकल कॉलेज मा न्यूरोलॉजी की ओपीडी की आज बटि शुरुवात ह्वे ग्ये, हर महीना कू अंतिम शनिवार का दिन मेडिकल कॉलेज मा खुलली न्यूरोलॉजी की ओपीडी, आज पहला दिन न्यूरोलॉजिस्ट डॉ. एचसी पाठक ना मरीजों कू करि चेकअप.
6. राजधानी देहरादून मा अतिक्रमणकारियों पर ह्वे कार्रवाई: राजधानी देहरादून मा अतिक्रमण का खिलाफ नगर निगम ना चलाई अभियान, ये मौके पर मुख्य सड़कों समेत फुटपाथ पर कया अतिक्रमण थै हटये ग्या, वखि इनामुल्लाह बिल्डिंग, प्रिंस चौक, सहारनपुर चौक, पटेल नगर और माजरा मा सड़क किनरा खड़ी रेहड़ी-ठेलियों थै भि नगर निगम की टीम ना करि जब्त, ये दौरान अतिक्रमणकारियों ना कार्रवाई कू करि विरोध, अतिक्रमण का चलदा शहर मा बणि च जाम की समस्या.
7. बीएचईएल का संविदा कर्मचारियों ना करि कार्य बहिष्कार: BHEL का संविदा कर्मचारियों थै अपणी नौकरी खतरा मा पुड़दि दिखेणी च, यन मा भेल का संविदा कर्मचारी हड़ताल पर छिन, अब भेल का संविदा कर्मचारियों थै नई कंपनी "कोर सिक्योरिटी सर्विसेस" का जरिये नौकरी मा रखे जाणु च, जैकू संविदाकर्मी विरोध कना छिन, कर्मचारियों ना भेल प्रबंधन का ये फैसला पर अपणि नाराजगी भी जतै, विरोध स्वरूप आज कर्मचारी चार घंटा तक कार्य बहिष्कार पर रहिन.
8. हल्द्वानी मा छह दिन बाद भी नि बुझी ट्रंचिंग ग्राउंड मा लगी आग: हल्द्वानी का गौलापर स्थित ट्रंचिंग ग्राउंड मा पिछले छह दिनों से कूड़ा कबाड़ पर लगी आग, कचरा से निकलण वल जहरीलु धुआं आसपास का लौखु खुण बणी मुसीबत, हल्द्वानी नगर निगम और फायर बिग्रेड की टीम छह दिनों से आग बुझाणा मा नाकाम, अब लौखु थै इंद्रदेव से ही आस.
9. डाडा जलालपुर गौं मा 27 अप्रैल का दिन संत करला महापंचायत: दिल्ली का जहांगीरपुर और हरिद्वार का डाडा जलालपुर गौ मा हनुमान जयंती पर शोभायात्रा मा ह्वाई बवाल थमणा कू नाम नि लिणु च, यै मामलों मा अभी तक मुख्य आरोपी की गिरफ्तारी नि हुण से संत समाज मा आक्रोश, संतों की काली सेना और धर्मसंसद का आयोजकों ना भगवानपुर का डाडा जलालपुर गौ मा आगामी 27 अप्रैल का दिन महापंचायत कना कू करि ऐलान, जिला प्रशासन की बढ़ी चिंता.
10. ऋषिकेश पौंचि गाड़ूघड़ा कलश यात्रा: नरेंद्र नगर राजमहल से तीर्थनगरी ऋषिकेश पौंचि गाड़ूघड़ा कलश यात्रा कू भक्तों ना पूजा अर्चना करि जोरदार स्वागत, बदरी केदार मंदिर समिति की चेला चेतराम धर्मशाला मा गाडूघड़ा थै श्रद्धालुओं का दर्शनार्थ रखे ग्यु च, कैबिनेट मंत्री प्रेमचंद अग्रवाल और ऋषिकेश मेयर अनीता ममगाईंन भी करि गाडूघड़ा का दर्शन. ये मौका पर श्रद्धालुओं थै वितरित किये ग्या भगवान बदरीनारायण कू भोग प्रसाद.
