ચૂંટણીના માહોલમાં નેતાઓ પર જોખમ, ઓલપાડના MLA સાથે મોબાઈલ સ્નેચિંગની ઘટના

સુરતઃ હાલ ચૂંટણીનો માહોલ હોવાથી નેતાઓની સુરક્ષા પર જોખમ રહેતું હોય છે. મંગળવારે કામરેજના ધારાસભ્યને ધમકી મળી હતી, તો આજે ઓલપાડના ધારાસભ્ય સાથે મોબાઈલ સ્નેચિંગની ઘટના બની છે. જો કે, ધારાસભ્યની સજાગતા અને હિંમતથી બંને આરોપીઓ જેલના સળિયા પાછળ ધકેલાયા છે.

ઓલપાડના ધારાસભ્ય મુકેશ પટેલ સુરતના નિવાસ્થાનેથી મિત્ર સાથે સવારે ચાલવા માટે માટે નીકળ્યા હતાં. તેઓ પોતાના મોબાઈલથી મિત્રને ફોન કરી રહ્યા હતા, તે દરમિયાન બાઈક પર આવેલા બે લબરમુછીયાઓએ મુકેશ પટેલનો મોબાઈલ ઝુંટવવાનો પ્રયાસ કર્યો હતો. જો કે, મુકેશ પટેલે મોબાઈલ સખ્તાઈથી પકડી રાખતા જોરથી રોડ પર પટકાયાં અને ઇજાગ્રસ્ત થયા હતા. સ્નેચિંગનો પ્રયાસ નિષ્ફળ જતા બંને લબરમુછીયાઓ ભાગી છૂટ્યા હતા. પરંતુ મુકેશ પટેલે બાઈક પર આવતા રાહદારી સાથે તેમનો પીછો કરી ઝડપીને બંનેને પોલીસને હવાલે કર્યા હતા.

મહત્વનું છે કે, મંગળવારે કામરેજના ધારાસભ્ય વી. ડી. ઝાલાવાડિયાને પણ સુરતના સીતા નગર ચોકડી ખાતે યુવાન દ્વારા ધમકી આપવામાં આવી હતી. આજે ઓલપાડના ધારાસભ્ય સાથે મોબાઈલ સ્નેચિંગ ઘટના બનતાં સરકારના પ્રતિનિધિ પર સુરક્ષાને લઈ સવાલ ઊભા થઈ રહ્યાં છે.