જૂનાગઢમાં મહિલાઓ દ્વારા હલ્લાબોલ, પાણી નહિ મળે તો મતદાનનો બહિષ્કાર

જૂનાગઢઃ ઉનાળાની શરૂઆતથી જ જૂનાગઢના હાર્દ સમા જાંજરડા વિસ્તારની મહિલાઓએ કર્યો હોબાળો કર્યો છે. તેમણે મનપાના અધિકારીઓ સમક્ષ પાણી આપવાની માંગ કરી આવેદનપત્ર આપ્યું છે.

ઉનાળાની શરૂઆતના દિવસોમાં જ પીવાના પાણીની કારમી તંગી ઉભી થઇ રહી હોવાના અહેવાલો મળી રહયા છે. જૂનાગઢ શહેરના હાર્દ સમા વિસ્તાર એવા જાંજરડા રોડમાં છેલ્લા 1 અઠવાડિયાથી પીવાનું પાણી નહિ આવતા મહિલાઓએ આજે મનપા કચેરીમાં જઈને હલ્લાબોલ કર્યો હતો. ઉનાળાની શરૂઆત થવાની સાથે જ પીવાના પાણીના પોકારો ઉઠી રહયા છે. આ બતાવે છે કે, આગામી 2 મહિના વધુ આકરા બની જશે.

શહેરના વધુ કેટલાક વિસ્તારો પીવાના પાણીને લઈને સંકટનો સામનો કરી રહયા છે, તેવામાં તે વિસ્તારના લોકોનો રોષ પણ બહાર આવી શકે તેવી શક્યતાઓ છે. જૂનાગઢ મનપા પાસે પીવાના પાણીનો મર્યાદિત સોર્સ છે. ઉનાળા દરમિયાન પાણીની જરૂરિયાતમાં વધારો થઇ શકે છે, ત્યારે આગામી દિવસોમાં આવા આંદોલન વધુ આક્રમક બની શકે છે.