મકાન દુર્ઘટનામાં મૃતકોના પરિજનોને આર્થિક સહાય કરતાં કોંગ્રેસના કર્ણદેવસિંહ જાડેજા

જામનગરઃ શહેરમાં દેવુભા ચોકમાં ત્રણ માળનું મકાન ધરાશાયી થતાં ત્રણ લોકોના મોત થયા હતાં. મૃતકોના પરિવારને આર્થિક સહાય માટે જિલ્લા કોંગ્રેસ સમિતિ દ્વારા  જિલ્લા કલેકટરને આવેદનપત્ર પાઠવવામાં આવ્યું હતું. સાથે કોંગ્રેસના કર્ણદેવ સિંહે ત્રણ મૃતકના પરિજનોને 11,000ના ચેક આપી મદદ કરી હતી. આ ઉપરાંત આજુબાજુના મકાનોને થયેલાં નુકસાનન સામે વળતર આપવાનું આશ્વાસન આપ્યું હતું.

જામનગરમાં ગત તારીખ 17ના રોજ દેવુભા ચોક વિસ્તારમાં મકાન ધરાશાયી થયું હતું. જેમાં અનવરભાઈ, મોહન રાઠોડ અને અશોક રાઠોડનું મોત થયું હતું. જામનગર મહાનગર પાલિકા અને વહીવટી તંત્ર દ્વારા દુર્ઘટનામાં અવસાન પામેલાં પરિવારજનોને કોઈ આર્થિક સહાય આપવામાં આવી નથી. તેમ જ રાજ્ય સરકાર દ્વારા પણ આર્થિક સહાય આપવામાં આવી નથી. ત્યારે સ્થાનિક તંત્રની બેદકારીના કારણે ત્રણમાંથી પૈકી એકનું મોત થયું હોવાના ગંભીર આક્ષેપો સ્થાનિકો દ્વારા કરવામાં આવી રહ્યાં છે.

આ અંગે સ્થાનિકો જણાવી રહ્યાં છે કે, "જામનગર મહાનગરપાલિકાની રેસ્ક્યુ ટીમ દ્વારા ફરજમાં બેદરકારીના કારણે એક વ્યક્તિનું મોત થયું હતું. રેસ્ક્યુ ઓપરેશન કલાકો સુધી બંધ રાખતા કાટમાળમાં ફસાયેલાં મોહનભાઈ રાઠોડનું ગૂંગળામણને કારણે મોત થયું હતું." આ જીવલેણ દૂર્ઘટના બાદ પણ તંત્ર દ્વારા સ્થાનિકોને કોઈ આર્થિક સહાય કરવામાં આવી નથી. એટલે કોંગ્રેસ શહેરના ઉપપ્રમુખ કર્ણસિંહ જાડેજાએ સ્થાનિકોને 11,000ની મદદ કરી હતી.