শুকুৰ আলী আহমেদক 'বুঢ়া বাঘ' আখ্যা আজমলৰ

বৰপেটাৰ চেঙা সমষ্টিৰ বিধায়ক তথা কংগ্ৰেছ প্ৰাৰ্থী শুকুৰ আলী আহমেদক 'বুঢ়া বাঘ' আখ্যা দিলে এআইইউডিএফ-ৰ সভাপতি বদৰুদ্দিন আজমলে । সোমবাৰে চেঙাত সমষ্টিটোৰ এআইইউডিএফ-ৰ প্ৰাৰ্থী আশ্ৰাফুল হুছেইনৰ হৈ নিৰ্বাচনী প্ৰচাৰ চলাই এই মন্তব্য কৰে দলৰ জ্যেষ্ঠ নেতাগৰাকীয়ে । লগতে তেওঁ কয় যে, শুকুৰ আলী আহমেদে এইবাৰ চেঙা সমষ্টিত আশ্ৰাফুল হুছেইনক বিজয়ী হোৱাৰ সুযোগ দিয়া উচিত । আজমলে আশ্ৰাফুল হুছেইন আৰু শুকুৰ আলী আহমেদৰ বয়সৰ কথা উল্লেখ কৰি শুকুৰ আলীক 'বুঢ়া বাঘ' আখ্যা দিয়ে । সোমবাৰে চেঙা সমষ্টিত এআইইউডিএফে প্ৰাৰ্থী আশ্ৰাফুল হুছেইনৰ সমৰ্থনত বিশাল ৰেলীৰ আয়োজন কৰে । মাজদিয়া-ছাটা পাঁচপীড় দৰগাহত দোৱা গ্ৰহণৰ পিছতে এই বিশাল ৰেলীত অংশ লয় দলৰ সভাপতি গৰাকীয়ে । তেওঁ কয় যে, এইবাৰ বিধানসভা নিৰ্বাচনত মহাজোঁটে ৭৪ আসন লাভ কৰিব আৰু ২০ খনৰ ভিতৰত ১৯ খনতে জয়লাভ কৰিব এআইইউডিএফে । চেঙা সমষ্টিত কংগ্ৰেছৰ চাৰিবাৰৰ বিধায়ক তথা ৰাজ্য চৰকাৰৰ প্ৰাক্তন মন্ত্ৰী শুকুৰ আলী আহমেদৰ সৈতে বন্ধুত্বমূলক প্ৰতিদ্বন্দ্বিতাত অৱতীৰ্ণ হৈছে এআইইউডিএফ-ৰ প্ৰাৰ্থী আশ্ৰাফুল হুছেইন ৷