শিৱসাগৰ,আমগুৰি,17 জুলাইঃ আমগুৰি ই-ৰিক্সা চালক সন্থাৰ এক ব্যতিক্ৰমী প্ৰচেষ্টাই সকলোৰে দৃষ্টি আকৰ্ষণ কৰিবলৈ সক্ষম হৈছে ৷ দেওবাৰে আমগুৰি দেওবৰীয়া বজাৰৰ সমীপত থকা অত্যাধুনিক শান্তিবন উদ্যানৰ চাফাই অভিযানত সন্থাৰ সদস্যসকলক স্বেচ্ছাই শ্ৰমদান কৰা দেখা গ'ল ৷ আমগুৰি ই-ৰিক্সা চালক সন্থাৰ উদ্যোগত প্ৰায় অৰ্ধ-শতাধিক ই-ৰিক্সা চালকে হাতত কোৰ-ঝাড়ু লৈ অপৰিস্কাৰ হৈ থকা শান্তিবনৰ চাফাই কাৰ্য সম্পন্ন কৰে।
চাফাই অভিযানত নামিল আমগুৰি ই-ৰিক্সা চালক সন্থা
উল্লেখ্য যে ২০০৫ চনতে নিৰ্মাণ কৰা আমগুৰিৰ অত্যাধুনিক শান্তিবনখন প্ৰয়োজনীয় চোৱা-চিতাৰ অভাৱত চৌপাশ হাবি-জংঘলেৰে আৱৰি ধৰাত অপৰিষ্কাৰ হৈ আছিল ৷ চাফাই অভিযানত সদস্যসকলক আমগুৰি ই-ৰিক্সা চালক সন্থাৰ সভাপতি ৰাজেন গগৈ আৰু সম্পাদক দীপক দাসে সংগ প্ৰদান কৰে ৷ আমগুৰি ই-ৰিক্সা চালক সন্থাৰ এনে প্ৰশংসনীয় পদক্ষেপক আমগুৰিৰ স্থানীয় ৰাইজে আদৰণি জনায় ৷
