নগাঁও, 30 এপ্ৰিলঃ বিদ্যালয় পৰিচালনা সমিতিৰ সভাপতিৰ চহী জালিয়াতি কৰি বিদ্যালয়ৰ ধন আত্মসাৎ কৰাৰ অভিযোগত, আৰক্ষী থানাত দুটাকৈ গোচৰ ৰুজু হৈছে নগাঁও জিলাৰ জুৰীয়াৰ এখন চৰকাৰী বিদ্যালয়ৰ প্ৰধান শিক্ষকৰ বিৰুদ্ধে । জুৰীয়াৰ নামা কালিয়াডিঙা মুক্তাৱ বিদ্যালয়ৰ প্ৰধান শিক্ষক আফজ উদ্দিনৰ বিৰুদ্ধে উত্থাপিত হৈছে এই অভিযোগ ।
লোকগৰাকীৰ বিৰুদ্ধে বিদ্যালয়খনৰ পৰিচালনা সমিতিৰ সভাপতি আব্দুৰ ৰফিকৰ লগতে পাঞ্জাৱ নেশ্যনেল বেংকৰ জুৰীয়া শাখাৰ প্ৰবন্ধকে, জুৰীয়া আৰক্ষী থানাত দাখিল কৰা এজাহাৰৰ ভিত্তিত পৃথকে পৃথকে ৰুজু হৈছে গোচৰ । বিদ্যালয়খনৰ প্ৰধান শিক্ষক আৰু পৰিচালনা সমিতিৰ সভাপতিৰ নামত থকা যুটীয়া একাউন্টৰ পৰা প্ৰধান শিক্ষকজনে প্ৰথমে ৫০ হাজাৰ টকা মোকলাই নিয়াৰ পিচত, পুনৰ ২ লাখ ৭ হাজাৰ টকা মোকলাই নিব বিচৰাৰ সময়তে পোহৰলৈ আহে জালিয়াতিৰ তথ্য । বেংক কৰ্তৃপক্ষৰ সন্দেহ হোৱাত পৰিচালনা সমিতিৰ সভাপতি আব্দুৰ ৰফিকক অৱগত কৰাৰ পিচতেই ধৰা পৰে প্ৰধান শিক্ষকজনৰ জালিয়াতি । লগে লগে বেংক কৰ্তৃপক্ষই আৰক্ষী থানাত দাখিল কৰা এজাহাৰৰ ভিত্তিত ১৪৮/২০ নম্বৰত ভাৰতীয় দণ্ডবিধিৰ ১৮৮/৪২০/৪০৬/৪৬৮ নম্বৰত এটা গোচৰ ৰুজু কৰাৰ লগতে, বিদ্যালয় পৰিচালনা সমিতিৰ সভাপতিয়ে দাখিল কৰা এজাহাৰৰ ভিত্তিত আন এটা গোচৰ ৰুজু কৰি আৰক্ষীয়ে অব্যাহত ৰাখিছে তদন্ত ।
