কলিয়াবৰ, 8 ফেবাৰুৱাৰীঃ কলিয়াবৰৰ অগ্ৰণী অপেছাদাৰী নাট্যানুষ্ঠান হাটবৰ কেন্দ্ৰীয় নাট্য সমাজে বিগত প্ৰায় আঠ দশকে অব্যাহত ৰাখিছে নিজৰ অবিৰত যাত্ৰা ৷ শুকুৰবাৰে অনুষ্ঠানটোৰ স্থায়ী মঞ্চত হাটবৰ কেন্দ্ৰীয় নাট্যসমাজৰ শিল্পীসকলে পৰিৱেশন কৰে দুখনকৈ নাটক ৷ নাট্যকাৰ ভূপেন্দ্ৰ নাথ হাজৰিকাৰ ৰচনা আৰু প্ৰাঞ্জল মহন্তৰ পৰিচালনাৰে শিশু নাট "অ-আ" আৰু নাট্যকাৰ অজিত বৰঠাকুৰৰ নাটক "ক্ৰিয়া-প্ৰতিক্ৰিয়া" এই দুখনি নাট মঞ্চস্থ কৰে শিপ্লীসকলে ৷ নাট্যকাৰ ভূপেন্দ্ৰ নাথ হাজৰিকাৰ শিশু নাট "অ-আ"ত বৰ্তমান সময়ত শিশুসকলৰ মাজত অভিভাৱকে সুমোৱাই দিয়া অসমীয়া ভাষা বিদ্বেষৰ দৰে স্পৰ্শকাতৰ বিষয় এটা সুন্দৰকৈ উপস্থাপন কৰে ছয়টি শিশুৱে যথাক্ৰমে – বিদিশা গায়ন,প্ৰীতিকঙ্কনা মুক্তিয়াৰ,হিমাংশু বৰুৱা,পৰিণিত কৌশিক কাশ্যপ,হীমজ্যোতি হাজৰিকা আৰু ধনশ্ৰী গায়নে ৷ নাটখনত ব্যংগ চৰিত্ৰত অভিনয় কৰিছে শিশু শিল্পী হিমাংশু আৰু পৰিণিতে ৷
উল্লেখ্য যে, ত্ৰিপুৰাৰ আগৰতলাস্থিত ৰাষ্ট্ৰীয় নাট্য বিদ্যালয়ৰ উঃপূঃ কেন্দ্ৰত "থিয়েটাৰ ইন এডুকেচন" পাঠ্যক্ৰম সফলতাৰে সমাপ্ত কৰি অহা প্ৰাঞ্জল মহন্তই,জাৰ্মানৰ ব্ৰেচ্ট থিয়েটাৰ শৈলীত নাট মঞ্চস্থ কৰি সমাদৰ লাভ কৰিবলৈ সক্ষম হৈছে ৷ আনহাতে নাট্যকাৰ অজিত বৰঠাকুৰৰ "ক্ৰিয়া-প্ৰতিক্ৰিয়া" নাটখনি পৰিৱেশন কৰে নাট্য সমাজৰ জ্যেষ্ঠ শিল্পীসকলে ৷