নগাঁও,16 ফেব্ৰুৱাৰীঃ নিৰ্বাচনৰ দিন যিমানেই চমু চাপি আহিছে সিমানেই ৰাজনৈতিক দল-সংগঠনৰ মাজত আৰম্ভ হৈছে নিৰ্বাচনী তৎপৰতা ৷ সকলো ৰাজনৈতিক দল-সংগঠনে নিৰ্বাচনী ৰণডংকা বজাবলৈ সাজু হৈছে ৷ আনহাতে, ৰাজনৈতিক সভা-সমিতিয়ে আৰম্ভ হৈছে ৰাজনৈতিক নেতাৰ বাক-যুদ্ধ ৷ সোমবাৰে নগাঁৱৰ খুটিকটীয়া ৰাস ফিল্ডত অনুষ্ঠিত হয় ভাৰতীয় জনতা দলৰ পৃষ্ঠা প্ৰমুখ সন্মিলনী ৷ এই সন্মিলনতে বিধায়ক উৎপল বৰাই কটাক্ষ কৰিলে প্ৰধান বিৰোধী দল কংগ্ৰেছক ৷ কংগ্ৰেছে বহুদিন পূৰ্বেই অসম ধ্বংস কৰাৰ পিছত এতিয়া অসম বচাও কাৰ্যসূচীৰ কোনো যুক্তি নাই বুলিও মন্তব্য কৰে বিধায়কগৰাকীয়ে ৷
উল্লেখ্য যে, এই পৃষ্ঠা প্ৰমুখ সন্মিলনত নগাঁও সদৰ বিধানসভা সমষ্টিত নিযুক্তি দিয়া ২,৬১১ গৰাকী পৃষ্ঠা প্ৰমুখ উপস্থিত থাকে ৷ এই সভাৰ পৰাই বিজেপি চৰকাৰৰ দিনত হোৱা উন্নয়নমূলক কামৰ বিষয়ে তৃণমূল পৰ্যায়ত প্ৰচাৰ কৰিবলৈ পৃষ্ঠা প্ৰমুখসকলক আহ্বান জনায় বিধায়ক উৎপল বৰাই ।
আনহাতে, বিজেপি চৰকাৰখনে কৰা উন্নয়নমূলক কামৰ বাবেই নগাঁও সদৰ সমষ্টিত পূৰ্বতকৈও অধিক ভোটৰ ব্যৱধানত বিজেপিৰ প্ৰাৰ্থী জয়ী হ’ব বুলি মন্তব্য কৰে বিধায়কগৰাকীয়ে ৷
লগতে পঢ়কঃ পেলনীয়া প্লাষ্টিকৰ বটলেৰে নিৰ্মিত ৰাজহুৱা শৌচাগাৰ
