ধিং, 9 ছেপ্টেম্বৰ : প্ৰথম বাৰৰ বাবে মৰিগাঁও জিলাৰ মায়ং আঞ্চলিক মহাবিদ্যালয়ত উপস্থিত হয় অসমৰ ৰাজ্যপাল গোলাব চান্দ কাটাৰিয়া ৷ NAAC ৰ A+ গ্ৰেড লাভ কৰা মৰিগাঁও জিলাৰ মায়ং আঞ্চলিক মহাবিদ্যালয়ত শনিবাৰে অনুষ্ঠিত কৰা হয় "আত্ম নিৰ্ভৰ ভাৰতৰ বাবে দক্ষ যুৱক" বিষয়বস্তুৰ ওপৰত যুৱ সন্মিলন 2.0 ৷
উত্তৰ-পূব দক্ষতা কেন্দ্ৰ, অসম চৰকাৰ, অসম দক্ষতা বিকাশ মিছন-এন.ই.এছ.চি আৰু গুৱাহাটী বিশ্ববিদ্যালয়ৰ এন.এছ.এছ. গোটৰ সহযোগত এই অনুষ্ঠানটিৰ আয়োজন কৰা হয় ৷ অনুষ্ঠানত মুখ্য অতিথি হিচাবে উপস্থিত থাকে অসমৰ ৰাজ্যপাল গোলাব চান্দ কাটাৰিয়া ৷ ৰাজ্যপাল গৰাকীয়ে এই অনুষ্ঠানটোত উপস্থিত থকা যুৱক-যুৱতী সকলক উদ্দেশ্যি কাৰিকৰী বিষয়ত ভাৰত চৰকাৰে ৰূপায়ণ কৰি থকা বিভিন্ন দিশসমূহ উল্লেখ কৰে ৷ তদুপৰি আত্মনিৰ্ভৰ হ’বলৈ নৱ-প্ৰজন্মই কেনেদৰে আগবাঢ়িব লাগে তাক উল্লেখ কৰি মহাবিদ্যালয় সমূহত আত্মনির্ভৰতাৰ ওপৰত শিক্ষা প্ৰদান কৰিব লগে বুলিও উল্লেখ কৰে ৰাজ্যপাল গৰাকীয়ে ৷
অনুষ্ঠানত অসম দক্ষতা কেন্দ্ৰৰ বিষয়ববীয়া, অসম চৰকাৰৰ শিক্ষক শিক্ষা পৰিষদৰ সচিবৰ লগতে মাষ্টাৰ চেফ বিজয়ী নয়নজ্যোতি শইকীয়া উপস্থিত থাকে ৷ অনুষ্ঠানত অসম চৰকাৰৰ দক্ষতা বিকাশ অভিযানৰ জৰিয়তে কেনেদৰে যুৱক-যুৱতী সকল উপকৃত হ’ব পাৰে বা কেনেদৰে কৰ্ম সংস্থাপন লাভ কৰিব পাৰে ইয়াৰ ওপৰত বাখ্যা আগবঢ়োৱা হয় ৷ অনুষ্ঠানটো আঁত ধৰে মায়ং আঞ্চলিক মহাবিদ্যালয়ৰ অধ্যাপক ড৹ উৎপল নাথে ৷ আদৰণি ভাষণ আগবঢ়াই মহাবিদ্যালয়ৰ অধ্যক্ষ ড৹ মহানন্দ বৰাই ৷ সভাখনত অঞ্চলটোৰ প্ৰায় তিনি শতাধিক ৰাইজ উপস্থিত থাকে ৷
লগতে পঢ়ক : Rehabilitation in Dhemaji : চিলাপথাৰত ব্ৰহ্মপুত্ৰত খহনীয়াগ্ৰস্ত ১৫০ পৰিয়ালক চৰকাৰী ভূমিত সংস্থাপন
