কোকৰাঝাৰ ,১৮ জুলাই: বুধবাৰে কোকৰাঝাৰত খাকী পোছাকধাৰী সকলে উত্তাল কৰি তোলে কোকৰাঝাৰ ডাক ঘৰৰ চৌহদ । ডাক ঘৰত নিৰাপত্তা দিয়াৰ বাবে নিয়োজিত অসম হোমগাৰ্ড জোৱান সকলে বিগত ছয় মাহ ধৰি দৰমহা লাভ নকৰাৰ প্ৰতিবাদত তেওঁলোকৰে কৰ্ম বিৰোধী কৰাৰ লগতে ডাকঘৰ চৌহদ উত্তাল কৰি তোলে ।
তেওঁলোকৰ অভিযোগ অনুসৰি ধুবৰী উপসংমণ্ডল ডাকঘৰৰ অধীনত নিয়োজিত হোৱা মুঠ ছয়জন হোমগাৰ্ড যোৱা দিচেম্বৰ মাহৰ পৰা দৰমহাৰ পৰা বঞ্চিত হৈ আছে । প্ৰতিমাহে তেওঁলোকে 17,700 টকা দৰমহা হিচাপে লাভ কৰিব লাগিছিল যদিও আজি আঠ মাহ অতিক্ৰম কৰাৰ পিচতো তেওঁলোকে দৰমহা লাভ নকৰিলে । সেয়ে জোৱান সকলে বুধবাৰে অনিৰ্দিষ্টকালীন কৰ্ম বিৰোধী কৰাৰ লগতে পোষ্টাৰ, বেনাৰ আদি লৈ বিভিন্ন শ্লোগানৰে ডাকঘৰ চৌহদ উত্তাল কৰি তোলে । কৰ্ম কৰিও দৰমহা নোপোৱাৰ ফলত পৰিয়াল পোহপাল দিয়াত তেওঁলোকৰ হাঁহ নচৰা অৱস্থা হোৱা বুলি কৈ অতি শীঘ্ৰে বকেয়া ধন মোকলাই দিয়াৰ দাবী জনাইছে জোৱান সকলে । আনফালে কোকৰাঝাৰ ডাকঘৰৰ পোষ্ট মাষ্টাৰে সদৰী কৰে যে কোকৰাঝাৰ ডাকঘৰৰ পৰা যাৱতীয় নথি আৰু তথ্য ঠিক সময়ত ধুবৰী উপসংমণ্ডলৈ পঠোৱা হৈছে । কিন্তু উচ্চ পৰ্যায়ৰ ডাকঘৰ পৰিচালনাৰ পৰা কি কাৰণত বকেয়া ধন মোকোলাই দিয়া নাই এয়া উচ্চ পৰ্যায়ৰ বিভাগীয়হে কব পাৰিব বুলি স্পষ্ট কৰে । এতিয়া কথা হল, ধুবৰী উপসংমণ্ডল ডাকঘৰ কৰ্তৃপক্ষইহে গুৱাহাটীলৈ দৰমহা বিলখন পঠোৱা নাইনে গুৱাহাটী ডাকঘৰ কাৰ্যালয় পৰাই দৰমহাৰ বিল খন কোকৰাঝাৰ ডাকঘৰলৈ পঠোৱা নাই সেয়া এক লক্ষণীয় বিষয় হৈ পৰিছে ।
