দক্ষিণ কামৰূপ, 20 নৱেম্বৰ : বুধবাৰে কামৰূপ জিলা পথ সুৰক্ষা সমিতিৰ উদ্যোগত মহানগীৰৰ সমীপৰ মিৰ্জাত আগন্তুক শীতকালত কুঁৱলীৰ আচ্ছাদনত পথত চলাচল কৰাৰ লগতে বনভোজস্থলীলৈ যাওঁতে গাড়ী চালকে ল'বলগীয়া সাৱধানতা সন্দৰ্ভত "পথ সুৰক্ষা সজাগতা সভা" অনুস্থিত হয় । ইতিমধ্যে শীতকালত বনভোজ খাবলৈ আহি পথ দুৰ্ঘটনাত পতিত হৈ বহু লোক মৃত্যুমুখত পৰে লগতে কুঁৱলীৰ আচ্ছাদনৰ ফলতো বহুতো দুৰ্ঘটনা সংঘটিত হয় । সেয়ে এই ক্ষেত্ৰত ৰাইজক সজাগ আৰু সচেতনতা কৰাৰ উদ্দেশ্যে এই 'পথ সুৰক্ষা সজাগতা সভা' অনুস্থিত কৰা হয়।
অনুষ্ঠানটোত বনভোজলৈ যাওঁতে চালক তথা যাত্ৰীসকলে অধিক মদ্যপান কৰাৰ বাবে কেনেদৰে দুৰ্ঘটনা সংঘটিত হয় তাক উপলব্ধি কৰাবলৈ এখন বাটৰ নাটকো প্ৰদৰ্শন কৰা হয় ৷ এই সজাগতা সভাত উপস্থিত থাকে জিলা উপায়ুক্ত কমল কুমাৰ বৈশ্য,জিলা পৰিবহন বিষয়া গৌতম দাসৰ লগতে আৰক্ষী প্ৰশাসনৰ বহুতো লোক । জিলা উপায়ুক্ত কমল কুমাৰ বৈশ্যই এই ক্ষেত্ৰত সকলো ৰাইজক পথ দুৰ্ঘটনা ৰোধত সহায়-সহযোগিতা আগবঢ়াবলৈ আহ্বান জনায় ।
