গুৱাহাটী, 11 জানুৱাৰীঃ হেঙেৰাবাৰীস্থিত ৰাজ্যিক বিজেপিৰ মুখ্য কাৰ্যালয়ত শনিবাৰে দলটোৰ মুখপাত্ৰ জয়ন্ত মল্ল বৰুৱা আৰু পবিত্ৰ মাৰ্ঘেৰিটাই এখন যুটীয়া সংবাদমেল সম্বোধন কৰে । সংবাদমেলত বিজেপিৰ মুখপাত্ৰ জয়ন্ত মল্ল বৰুৱাই কয় যে, অসমৰ একাংশ সংবাদ মধ্যমত বিগত এমাহে অপপ্ৰচাৰ চলাই অসমখন অশান্ত কৰি আহিছে । ঢোল পেঁপা বজোৱা শিল্পীয়েও ১৮% GST দিব লাগিব বুলি শেহতীয়াকৈ একাংশ সংবাদমাধ্যমে অপ্ৰচাৰ চলাবলৈ আৰম্ভ কৰিছে বুলিও গুৰুত্বৰ অভিযোগ উত্থাপন কৰে জয়ন্ত মল্ল বৰুৱাই । ইমানেই নহয়, বিহু কমিটিয়েও GST দিব লাগিব বুলি একাংশ সংবাদ মাধ্যমত বাতৰি সম্প্ৰচাৰ হোৱা সন্দৰ্ভত স্থিতি ষ্পষ্ট কৰি মুখপাত্ৰ গৰাকীয়ে কয় যে, অনুষ্ঠানৰ টিকটৰ মূল্য ৫০০ টকাতকৈ কম হ'লে দিব নালাগে GST ।
ইমানেই নহয়, সদৌ অসম ছাত্ৰ সন্থাৰ সাধাৰণ সম্পাদক লুৰিণ জ্যোতি গগৈক সমালোচনা কৰি জয়ন্ত মল্ল বৰুৱাই কয় যে, "ন্যূনতম জ্ঞান নথকা এজন নেতা কেনেকৈ ইমান ডাঙৰ সংগঠনৰ সাধাৰণ সম্পাদক হৈ আছে ? তেওঁ পদত্যাগ কৰিব লাগে । ২০১৭ চনত নাগৰিকত্ব সংশোধনী আইন আহিছিল নেকি ?" লুৰিন জ্যোতি গগৈক অলপ পঢ়া শুনা কৰি আন্দোলন কৰিবলৈ আহ্বান জনায় জয়ন্ত মল্ল বৰুৱাই।
ইপিনে সংবাদমেলত বিজেপিৰ মুখপাত্ৰ পবিত্ৰ মাৰ্ঘেৰিটাই কয় যে, অসমৰ বিহু উদযাপন কমিটিলৈ কোনো জাননী যোৱা নাই। একাংশ সংবাদমধ্যমে অপপ্ৰচাৰৰ জৰিয়তে সংস্কৃতিক পৰিৱেশ বিনষ্ট কৰিব বিচাৰিছে । যাৰ উপাৰ্জন ২০ লাখতকৈ অধিক তেওঁলোকে যোৱা তিনিবছৰে GST দি আহিছে।"
