গুৱাহাটী, ২৯ এপ্ৰিলঃ বৰ্তমানো অব্যাহত আছে কৰ'ণা ভাইৰাছৰ সংহাৰী ৰূপ । যাৰ বাবে দেশত চলি আছে লক ডাউন। লকডাউনৰ বাবে এতিয়া বন্ধ হৈ আছে অফিচ, শিক্ষানুষ্ঠান আদি । পৰিস্থিতিৰ প্ৰতি লক্ষ্য ৰাখি শিক্ষানুষ্ঠানসমূহে সলনি কৰিছে শৈক্ষিক সূচী । শেহতীয়াকৈ গুৱাহাটী বিশ্ববিদ্যালয়ে ঘোষণা কৰিছে নতুন বৰ্ষৰ শৈক্ষিক সূচী । এক বিশেষ জাননীযোগে নতুন শৈক্ষিক সূচী কথা গুৱাহাটী বিশ্ববিদ্যালয়ৰ অধীনস্থ মহাবিদ্যালয়সমূহক জনাইছে কৰ্তৃপক্ষই । নতুন সূচী অনুসৰি উচ্চতৰ মাধ্যমিকৰ ফলাফলৰ লগত সংগতি ৰাখি অহা ১৫ জুলাইৰ ভিতৰত সম্পূৰ্ণ হ'ব স্নাতক প্ৰথম ষান্মাসিকৰ নামভৰ্তি।
তাৰোপৰি জুন মাহত অনুষ্ঠিত হ'ব স্নাতক দ্বিতীয়, চতুৰ্থ আৰু ষষ্ঠ সান্মষিকৰ পৰীক্ষাসমূহ । ইফালে সকলো ধৰণৰ স্নাতকোত্তৰ পৰীক্ষা ১৫ আগষ্টৰ পাছতহে অনুষ্ঠিত কৰাৰ কথাও জাননীত উল্লেখ কৰা হৈছে । লগতে বি এড, এম. এড পৰীক্ষাসমূহ জুলাইৰ শেষ সপ্তাহৰ পৰা আৰম্ভ হ'ব বুলি উল্লেখ আছে ।
উল্লেখযোগ্য যে ইয়াৰ পূৰ্বে জুলাইৰ গ্ৰীষ্ম বন্ধ বাতিল কৰিছিল গুৱাহাটী বিশ্ববিদ্যালয়ে ।
