গুৱাহাটী, ১৮ মে’ : কর্ণাটকৰ নিৰ্বাচনী ফলাফলে বিজেপিৰ আত্মবিশ্বাসত যথেষ্ট প্ৰভাৱ বিস্তাৰ কৰিছে । ২০২৪ চনৰ লোকসভা নিৰ্বাচনৰ প্ৰাকক্ষণত কৰ্ণাটকৰ শোচনীয় পৰাজয়ে শাসকীয় দলটোক যথেষ্ট শংকিত কৰি তুলিছে । এনে প্ৰেক্ষাপটতে সম্প্ৰতি দেশৰ আন প্ৰান্তৰ লগতে অসমতো নতুন ৰণকৌশলেৰে অগ্ৰসৰ হ’বলৈ সাজু হৈছে বিজেপি । কৰ্ণাটকৰ নিৰ্বাচনী ফলাফলৰ পিচতে বিজেপিৰ ৰাষ্ট্ৰীয় নেতৃত্বৰ নিৰ্দেশমৰ্মে ৰাজ্যিক বিজেপিয়ে অহা ২০ মে'ত জৰুৰীভাৱে আয়োজন কৰিছে বৰ্ধিত কাৰ্যনিৰ্বাহক সভাৰ । শ্ৰীমন্ত শংকৰদেৱ কলাক্ষেত্ৰত অনুষ্ঠিত হ’বলগীয়া এই বৰ্ধিত কাৰ্যনিৰ্বাহক সভাৰ আগদিনা অর্থাৎ ১৯ মে'ত অনুষ্ঠিত হ’ব দলীয় বিষয়ববীয়াৰ সভা । ইতিমধ্যে এই কাৰ্যনিৰ্বাহক সভাত সকলো কাৰ্যনিৰ্বাহক সদস্যক উপস্থিত থাকিবৰ বাবে ৰাজ্যিক কমিটীয়ে নিৰ্দেশনা জাৰি কৰিছে (BJP election stategy) ।
শাসকীয় দলটোৰ এটা শীৰ্ষ সূত্ৰই জনোৱা মতে ৰাজ্যিক বিষয়ববীয়াৰ সভা আৰু বৰ্ধিত কাৰ্যনিৰ্বাহক সভাতে ২০২৪ চনৰ লোকসভা নিৰ্বাচনক লৈ বিস্তৃতভাৱে আলোচনা কৰা হ'ব । কৰ্ণাটক বিধানসভাৰ নিৰ্বাচনৰ প্ৰভাৱ যাতে লোকসভাৰ নিৰ্বাচনত পৰিব নোৱাৰে, সেই দিশত চকু দি কেইবাটাও গুৰুত্বপূৰ্ণ বিষয় কাৰ্যনিৰ্বাহকত আলোচনা কৰা হ’ব বুলি সূত্ৰটোৱে জানিবলৈ দিয়ে । সূত্ৰটো অনুসৰি লোকসভা নিৰ্বাচনৰ প্ৰতি লক্ষ্য ৰাখিয়ে ৩০ মে’ৰ পৰা বিজেপিয়ে ৰাজ্যজুৰি আৰম্ভ কৰিব মহাসম্পৰ্ক অভিযান । এই মহাসম্পর্ক অভিযানে সামৰি ল'ব ৰাজ্যখনৰ সকলো হিতাধিকাৰীৰ লগতে সাধাৰণ জনতাক । বিজেপি কার্যকর্তাসকলে প্ৰতিজন হিতাধিকাৰীৰ বাসগৃহলৈ গৈ কেন্দ্ৰীয় আৰু ৰাজ্য চৰকাৰৰ আঁচনি তথা কাম-কাজৰ বিষয়ে অৱগত কৰাৰ লগতে আগন্তুক সময়ত তেওঁলোকৰ পৰা সহায় আৰু সমর্থন বিচাৰিব । কেৱল হিতাধিকাৰী বুলিয়েই নহয়, গাঁৱে-ভূঞে, চহৰে-নগৰে থকা প্ৰতিটো পৰিয়ালৰ ওচৰলৈ যাব বিজেপিৰ কাৰ্যকৰ্তা । ইয়াৰ বাবে গঠন কৰা হ'ব কেইবাখনো কমিটী । য’ত থাকিব মন্ত্ৰী-বিধায়কৰ লগতে সাংসদ আৰু ৰাজ্যিক বিষয়ববীয়া ।
মহাসম্পর্ক অভিযানৰ জৰিয়তে বিজেপি কার্যকর্তাসকলে দলৰ পুৰণি নেতা-কৰ্মীৰ ঘৰলৈ গৈ আশীৰ্বাদ আৰু সমৰ্থন বিচাৰিব । তদুপৰি সমাজৰ বিশিষ্ট ব্যক্তিসকলকো সাক্ষাৎ কৰিব বিজেপিৰ কাৰ্যকৰ্তাসকলে । মহাসম্পর্ক অভিযানৰ বিষয়ে আলোচনা কৰিবলৈয়ে ১৯ আৰু ২০ মে’ত ৰাজ্যিক বিজেপিয়ে অনুষ্ঠিত কৰিবলৈ লৈছে ৰাজ্যিক বিষয়ববীয়া আৰু কাৰ্যনিৰ্বাহক সভাৰ । উক্ত সভাত নিৰ্বাচনী ৰণকৌশল সন্দৰ্ভত অন্যান্য বিষয়ো আলোচনা কৰিব শাসকীয় দলটোৱে । ইপিনে ৰাজ্যিক কাৰ্যনিৰ্বাহক সভা অনুষ্ঠিত হোৱাৰ পিচতে বিজেপিয়ে জিলা আৰু মণ্ডল পৰ্যায়তো কাৰ্যনিৰ্বাহক সভা অনুষ্ঠিত কৰি মহাসম্পৰ্ক অভিযানৰ বিষয়ে আলোচনা কৰিব (BJP drive after Karnataka results) ।
আনহাতে মহাসম্পৰ্ক অভিযানৰ সমান্তৰালকৈ মোডী চৰকাৰৰ নৱম বর্ষপূৰ্তি উপলক্ষেও এলানি কার্যসূচী গ্ৰহণৰ ব্যৱস্থা কৰিছে বিজেপিয়ে । মোডী চৰকাৰৰ বিভিন্ন আঁচনি তথা কাম-কাজ ৰাইজৰ মাজলৈ লৈ যাব বিজেপিৰ কার্যকর্তাসকলে । ২০২৪ৰ লোকসভা নিৰ্বাচনৰ প্ৰাকমুহূৰ্তলৈকে এনে তৎপৰতা চলাই যাব বিজেপিৰ কাৰ্যকৰ্তাসকলে । লক্ষণীয় বিষয় যে কৰ্ণাটকৰ বিধানসভা নিৰ্বাচনত কংগ্ৰেছৰ হাতত শোচনীয়ভাৱে পৰাস্ত হোৱাৰ পিচতে ২০২৪ ৰ লোকসভা নিৰ্বাচনক লৈ বিশেষভাৱে শংকিত হৈ পৰিছে বিজেপিৰ নেতৃবৃন্দ । আগন্তুক লোকসভা নিৰ্বাচনৰ পূৰ্বে অনুষ্ঠিত হ'ব ৰাজস্থান, ছত্তীশগড়, মধ্যপ্ৰদেশ, তেলেংগানা আৰু মিজোৰাম বিধানসভাৰ নিৰ্বাচন । উক্ত ৰাজ্যকেইখনৰ নিৰ্বাচনী ফলাফলৰ ওপৰতো এতিয়া দৃষ্টি নিবদ্ধ হৈছে দেশবাসীৰ । এনে প্ৰেক্ষাপটতে সম্প্ৰতি উদ্বিগ্ন হৈ পৰা গেৰুৱা দলটোৰ নেতৃবৰ্গই সকলো ৰাজ্যৰ দলীয় নেতৃত্বক তৃণমূল পর্যায়ত অভিযান চলাবলৈ নিৰ্দেশ দিছে । ইয়াৰ অংশস্বৰূপেই এতিয়া ৰাজ্যিক বিজেপিয়ে মহাসম্পর্ক অভিযান চলাবলৈ সাজু হৈছে ।
লগতে পঢ়ক : Modi cabinet reshuffle : ৰিজিজুক আঁতৰাই অৰ্জুন ৰাম মেঘৱালক নতুন আইন মন্ত্ৰী হিচাপে নিযুক্তি
