মৰাণ, ১ মে': ২ মে'ত অনুষ্ঠিত হ'বলগীয়া ভোট গণনাৰ পূৰ্বে জিলাই জিলাই ক'ভিড পৰীক্ষা সম্পন্ন কৰা হৈছে প্ৰাৰ্থী, কাউণ্টিং এজেণ্টৰ লগতে ভোট গণনা প্ৰক্ৰিয়া অংশগ্ৰহণ কৰিবলগীয়া বিষয়াসকলৰ । ডিব্ৰুগড়ৰ মৰাণতো নিৰ্বাচনী আয়োগৰ নিৰ্দেশ মৰ্মে ক'ভিড পৰীক্ষা সম্পন্ন কৰা হৈছে ।
শুকুৰবাৰে মৰাণৰ বিধায়ক চক্ৰধৰ গগৈয়ে মৰাণৰ ৰাজ্যিক চিকিৎসালয়ত ক'ভিড পৰীক্ষা কৰোৱায় । ক'ভিড পৰীক্ষাৰ ফলাফল অনুসৰি, তেওঁ কৰ'ণা ভাইৰাছৰ দ্বাৰা সংক্ৰমিত হোৱা নাই বুলি প্ৰমাণিত হয় যদিও বিধায়গৰাকীৰ দুজন দেহৰক্ষীৰ দেহত কৰ'ণা ভাইৰাছৰ উপস্থিতি ধৰা পৰে ।
আনহাতে, মৰাণৰ বিধায়ক চক্ৰধৰ গগৈৰ ব্যক্তিগত সচিব প্ৰণৱ গগৈ মহমাৰীত আক্ৰান্ত হোৱাৰ পিছৰে পৰা কেইবাদিনো ধৰি অসম চিকিৎসা মহাবিদ্যালয় হাস্পতালৰ আই চি ইউত সংকটজনক অৱস্থা ভৰ্তি হৈ আছে ।
শুক্ৰবাৰে প্ৰণৱ গগৈৰ আৰোগ্য কামনা কৰি বিধায়কৰ কাৰ্যালয়তে বিধায়কৰ লগতে দলীয় কৰ্মী সকলে বন্তি জ্বলাই প্ৰাৰ্থনা কৰে । ক'ভিড প্ৰট'কল মানি মৰাণৰ সকলো প্ৰাৰ্থীয়ে ২ মে'ৰ ভোট গণনাৰ বাবে সাজু হোৱা পৰিলক্ষিত হৈছে ।
লগতে পঢ়ক:মিকিৰ বামুণী গ্ৰাণ্টৰ কৃষকক উচ্ছেদ কৰাক লৈ প্ৰতিবেদন প্ৰকাশ