ধুবুৰী, ২৫ জানুৱাৰী : চোৰে বাৰুকৈয়ে জ্বলাকলা খুৱাইছে ধুবুৰীৰ এ. এম. কো. ৰোডৰ অয়ৰাণ জংলা অঞ্চলবাসীক । গৃহস্থ থকাৰ ঘৰৰ পৰাও কৌশলেৰে মূল্যৱান সামগ্ৰী লুটি নিয়ে চোৰে । অৱশেষত জালত পৰিল গভাইত চোৰ । দেওবাৰে ৰাইজে ৫ টা গভাইত চোৰক কৰায়ত্ত কৰি গতালে আৰক্ষীক । দেওবাৰে নিশা অয়ৰাণ জংলা গাঁৱৰ জহিৰুল ইছলাম নামৰ এজন লোকৰ ঘৰত চুৰিকাণ্ড সংঘটিত হয় ।
৪-৫ জনীয়া চোৰৰ দল এটাই নিশা নগদ ধন, চিলিণ্ডাৰ আৰু বিভিন্ন সামগ্ৰী লুটি নিয়ে । এই ঘটনাৰ উমান পাই পৰিয়ালটোৱে চিঞৰ-বাখৰ কৰাত গাঁৱৰ ৰাইজ ওলাই আহে আৰু ৫টা চোৰক কৰায়ত্ত কৰি উত্তম-মধ্যম সোধায় । পিছত ধৃত চোৰকেইটা ক্ৰমে মন্তাজ আলী মোল্লা, শ্বহীদ আলী, ছকেৰ আলী, ছামচুল হক আৰু আব্দুল আলিম শেখক ৰাইজে এ. এম. কো. ৰোড আৰক্ষীক গতাই দিয়ে ।
আৰক্ষীয়ে জেৰা অব্যাহত ৰখাৰ লগতে ঘটনা সন্দৰ্ভত তদন্ত আৰম্ভ কৰিছে । উল্লেখ্য যে, অঞ্চলটোত ড্ৰাগছৰ অবৈধ বেহা অব্যাহত থকাৰ লগতে বহু যুৱক ড্ৰাগছ আসক্ত হোৱাৰ বাবে চোৰৰ উপদ্ৰপ বৃদ্ধি পাইছে বুলি ধাৰণা কৰিছে একাংশ সচেতন ৰাইজে ।
লগতে পঢ়ক:সুদক্ষ আৰক্ষী বিষয়া ভায়'লেট বৰুৱালৈ 'ৰাষ্ট্ৰপতি পদক'
