অভয়াপুৰীত পথ দুৰ্ঘটনা; ছাত্ৰ নিহত

অভয়াপুৰীত এক শোকাৱহ পথ দুৰ্ঘটনা সংঘটিত হয় ৷ এখন তীব্ৰবেগী বাইকক বচাবলৈ গৈ এএছ ১৯চি ৬২৫৫ নম্বৰৰ ট্ৰাকখনে পথৰ কাষত ৰৈ থকা পিতা-পুত্ৰক মহতিয়াই নিয়ে৷

অভয়াপুৰী,27ছেপ্টেম্বৰঃ শুকুৰবাৰে দুপৰীয়া বইটামাৰী মলিগাঁও চ’কত সংঘটিত হয় এক শোকাৱহ পথ দুৰ্ঘটনা । উক্ত দুৰ্ঘটনাটোত থিতাতে মৃত্যু হয় এজন ছাত্ৰ । তথ্য মতে, নিহত ছাত্ৰ জন বইটামাৰী জাতীয় বিদ্যালয়ৰ প্ৰাক-প্ৰাথমিক শ্ৰেণীৰ ছাত্ৰ কনৌজশ্যাম সৰকাৰ ৷ লগতে দুৰ্ঘটনাটোৰ ফলত গুৰুতৰভাৱে আহত হয় পিতৃ কনক সৰকাৰ৷ স্থানীয় লোকৰ ভাষ্য অনুসৰি তিনিজন লোক উঠি অহা এখন তীব্ৰবেগী বাইকক বচাবলৈ গৈ এএছ ১৯চি ৬২৫৫ নম্বৰৰ ট্ৰাকখনে পথৰ কাষত ৰৈ থকা পিতা-পুত্ৰক মহতিয়াই নিয়ে ৷ ফলত এই শোকাৱহ দুৰ্ঘটনাটো সংঘটিত হয় । কণমানি ছাত্ৰ জনৰ এনে কৰুণ মৃত্যুত অঞ্চলটোত শোকৰ ছাঁ পৰিছে । এই দুৰ্ঘটনাৰ পাচতে স্থানীয় ৰাইজে অঞ্চলটোত স্পীড ব্ৰেকাৰৰ বাবে দাবী জনাইছে৷