বিশ্বনাথ, 21 ফেব্ৰুৱাৰী: অসম আদৰ্শ গ্ৰাম যোজনাৰ অধীনত গহপুৰ ডিপৰাত আদৰ্শ গাঁৱৰ আধাৰশিলা স্থাপন বিধায়ক উৎপল বৰাৰ ৷ শনিবাৰে গহপুৰ বিধানসভা সমষ্টিৰ অন্তৰ্গত কল্যাণী গাঁও পঞ্চায়ত অধীনৰ ডিপৰা গাঁৱৰ আধাৰশিলা স্থাপন কৰে বিধায়ক গৰাকীয়ে ৷ বৰাই কয়, আদৰ্শ গাঁওসমূহত সকলো নাগৰিকলৈ অনাময়ৰ সা-সুবিধা, পথ, নলা-নৰ্দমা, বিদ্যুৎ, খোৱা পানী, বিদ্যালয়, স্বাস্থ্য সেৱা প্ৰতিষ্ঠান নিৰ্মাণৰ লেখীয়া উন্নতমানৰ ৰাজহুৱা সেৱাসমূহ উপলব্ধ কৰা লগতে বিভিন্ন উন্নয়নমূলক কাম কৰা হ'ব ৷ ইয়াৰ উপৰিও বিভিন্ন ধৰ্মীয় অনুষ্ঠানসমূহ উন্নত কৰি পৰ্যটকক আকৰ্ষণ কৰিবলৈ বিভিন্ন পদক্ষেপ গ্ৰহণ কৰা হ’ব বুলিও উল্লেখ কৰে ।
গহপুৰ বিধানসভা সমষ্টিৰ দুখন আদৰ্শ গাঁৱৰ অংশ হিচাপে শনিবাৰে ডিপৰা বৰ নামঘৰৰ নিৰ্মাণ কাৰ্যৰ শুভাৰম্ভ কৰে বিধায়ক উৎপল বৰাই । আনহাতে বৰাই আধাৰশিলা অনুষ্ঠানত কংগ্ৰেছ দলৰ পৰিয়ালকেন্দ্ৰিক ৰাজনীতি আৰু প্ৰাক্তন বিধায়ক ৰিপুণ বৰাক কঠোৰ সমালোচনা কৰে । বিগত ১৫ টা বছৰে সমষ্টিত একো উন্নয়ন নকৰিলে ৰিপুণ বৰাই । য'ত ১৫ বছৰ কংগ্ৰেছে উন্নয়ন কৰিব নোৱাৰিলে, তাত মই ৪ বছৰত উন্নতি কৰিলো বুলি উল্লেখ কৰে বিধায়ক উৎপল বৰাই ।
উল্লেখ্য যে, কেন্দ্ৰীয় চৰকাৰৰ ধ্বজাবাহী আঁচনি সাংসদ আদৰ্শ গ্ৰাম যোজনাৰ প্ৰতি অভূতপূৰ্ব সঁহাৰিৰ লাভ কৰা পাছতে ২০১৮-১৯ বিত্তীয় বৰ্ষৰ বাজেটত অসম আদৰ্শ গ্ৰাম যোজনা শীৰ্ষক এক নতুন আঁচনিৰ কথা উল্লেখ কৰিছিল অসম চৰকাৰৰ বিত্ত মন্ত্ৰী ডঃ হিমন্ত বিশ্ব শৰ্মাই । গাঁৱৰ উন্নয়ন হ’লেহে অসমৰ উন্নয়ন সম্ভৱ বুলি প্ৰকাশ কৰিছিল মন্ত্ৰী গৰাকীয়ে । সমান্তৰালকৈ সৰ্বানন্দ সোণোৱাল নেতৃত্বাধীন চৰকাৰখনে গাঁৱৰ সৰ্বাংগীণ বিকাশত অধিক গুৰুত্ব দিয়াৰ লগতে গাঁৱৰ উন্নয়নৰ বাবে বিভিন্ন পদক্ষেপ গ্ৰহণ কৰিছে বুলি স্বাস্থ্য মন্ত্ৰী গৰাকীয়ে বিভিন্ন সভা-সমিতি লগতে বাজেটৰ সময়তো উল্লেখ কৰিছিল ।
অসম চৰকাৰে এই ‘অসম আদৰ্শ গ্ৰাম যোজনা’ আঁচনিৰ অধীনত অসমৰ একাংশ পিছপৰা গাঁৱক আদৰ্শ গাঁও হিচাপে গঢ়ি তোলা বাবে বিভিন্ন বিভাগৰ জৰিয়তে এক বৃহৎ আঁচনি প্ৰস্তুত কৰিছিল । সেই আঁচনিৰ জৰিয়তে পিছপৰা গাঁওসমূহ একো একোখন আদৰ্শ গাঁও হিচাপে গঢ়ি তোলাৰ বাবে বিজেপি চৰকাৰে আগ-ভাগ লৈ বিভিন্ন বিভাগৰ সৈতে আলোচনা কৰি সেই মৰ্মে প্ৰতিখন গাঁৱৰ উন্নয়নৰ বাবে ৫ কোটি টকা দিয়াৰ সিদ্ধান্ত গ্ৰহণ কৰিছিল ৷
