ওদালগুৰি,১১মে' : বাৰিষা সমাগত হোৱাৰ লগে-লগে ভৰি পৰিছে ৰাজ্যৰ নৈ-উপনৈসমূহ । বাৰিষাৰ পূৰ্বে ৰাজ্যৰ মথাউৰি মেৰামতি আৰু নিৰ্মাণ কৰাৰ বাবে মুখ্যমন্ত্ৰীয়ে নিৰ্দেশ দিছিল জলসম্পদ বিভাগক । কিন্তু বিভাগটোৱে মুখ্যমন্ত্ৰীৰ নিৰ্দেশৰ পাছতো গৰাখহনীয়া ৰোধৰ বাবে কোনো ব্যৱস্থা গ্ৰহণ নকৰাত শংকিত হৈ পৰিছে এতিয়া নৈ-পৰীয়া ৰাইজ ।
উল্লেখ্য যে, ওদালগুৰি জিলাৰ ওৰাঙৰ পাচনৈ নদীৰ ওপৰত মথাউৰি নিৰ্মাণৰ বাবে চৰকাৰে আবন্টন কৰিছিল ২.৭৪ কোটি টকা । ধূপগুৰী, চেঙেলীমৰা আৰু বিছখুটী অঞ্চলত নিৰ্মাণ কৰি থকা হৈছে এই মথাউৰিটো । কিন্তু জলসম্পদ বিভাগটোৱে অঞ্চলকেইটাত বালিৰে অতি নিম্নমানৰ মথাউৰি নিৰ্মাণ কৰা বুলি অভিযোগ উত্থাপন কৰে স্থানীয় ৰাইজে । ইপিনে,বালিৰে মথাউৰিটো নিৰ্মাণ কৰাৰ বাবে বাৰিষাৰ পূৰ্বে চপৰা-চপৰে খহি পৰে মথাউৰিটো । যাৰ বাবে শংকিত হৈ পৰে এতিয়া অঞ্চলবাসী । ৰাইজৰ মত অনুসৰি, পাচনৈ নদীৰ প্ৰলয়ংকাৰী বানে প্ৰতিবছৰে ক্ষতিগ্ৰস্থ কৰে ওৰাঙৰ বিছখুটী,চেঙেলীমৰা আৰু ধূপগুৰী অঞ্চল কেইটা । এই সন্দৰ্ভত স্থানীয় ৰাইজে চৰকাৰক বহুবাৰ জনায় আহিছে যদিও চৰকাৰে কোনো গুৰুত্ব নিদিয়াৰ অভিযোগ উত্থাপন অঞ্চলবাসীৰ । ভৰ-বাৰিষালৈ মাজত মাত্ৰ কেইটামান দিন থকা সময়তে মথাউৰিটো খহি পৰাত শংকিত হৈ পৰিছে এতিয়া অঞ্চলবাসী ।
