বৰপেটা, 24 জুন: বৰপেটাৰোড পৌৰসভাৰ উদ্যোগত বৰপেটাৰোড প্ৰেছ ক্লাবত দেওবাৰে বিয়লি ছয় বজাত অনুষ্ঠিত হয় এখন নাগৰিক সভা৷ সভাত উপস্থিত থাকে সৰভোগৰ বিধায়ক তথা বিজেপিৰ ৰাজ্যিক সভাপতি ৰঞ্জিত কুমাৰ দাস৷ সভাত এই বাৰিষাত যাতে বৰপেটাৰোডত কৃত্ৰিম বানপানীৰ সৃষ্টি হব নোৱাৰে তাৰবাবে কিছুমান গুৰুত্বপূৰ্ণ সিদ্ধান্ত গ্ৰহণ কৰা হয়৷
বৰ্তমান কৃত্ৰিম বানপানীৰ সমস্যাই ভয়াবহ ৰূপ ধাৰণ কৰাৰ লগতে আৱৰ্জনাৰ সমস্যাইও ৰাইজক জুৰুলা কৰিছে৷ ইয়াৰ বাবে ইতিমধ্যে ৰাজ্য চৰকাৰৰ নগৰ উন্নয়ন বিভাগে বৰপেটাৰোড চহৰৰ কৃত্ৰিম বানৰ সমস্যা সমাধান কৰা বাবে ৫ কোটি আৰু সৰভোগ নগৰৰ বাবে ৩ কোটি অনুমোদন জনোৱাৰ কথাও বিধায়ক গৰাকীয়ে সভাত উল্লেখ কৰে৷
এই অনুদানৰ জৰিয়তে চহৰ দুখনৰ নলাৰ কাম কৰা হ'ব বুলি ৰণজিৎ দাসে সদৰী কৰে। নিশা ন বজালৈকে চলা এই নাগৰিক সভাত বৰপেটাৰোড আৰু সৰভোগ চহৰৰ কেইবাজনো বিশিষ্ট ব্যক্তিয়ে বক্তব্য আগবঢ়ায়৷
