আগৰতলা, 6 মে': অতি দ্ৰুত গতিত ক'ভিড-19 ৰ ভয়াবহ সংক্ৰমণৰ ফালে আগবাঢ়িছে ত্ৰিপুৰা ৷ চিকিৎসা বিভাগৰ সৈতে জড়িত বিশেষজ্ঞ সকলে আগবঢ়োৱা মন্তব্য অনুসৰি, আগন্তুক এক ডেৰ মাহৰ ভিতৰত এই পৰিস্থিতি অধিক ভয়াৱহ দিশলৈ গতি কৰিব পাৰে ৷ প্ৰাপ্ত তথ্য অনুসৰি, বুধবাৰৰ দিনটোত ৰাজ্যখনত তিনি গৰাকী ক'ভিডত আক্ৰান্ত ৰোগীৰ মৃত্যু হোৱাৰ লগতে লগতে নতুনকৈ 240 গৰাকীৰ শৰীৰত উক্ত ভাইৰাছৰ উপস্থিতি ধৰা পৰে ৷ কিন্তু, ইয়াৰ মাজতে আটাইতকৈ উদ্বেগজনক কথাটো হ'ল এইয়ে যে, বয়স্ক সকলৰ লগতে এইবাৰ ৰাজ্যখনত শিশু সকলো ক'ভিডত আক্ৰান্ত হৈছে ৷
একেই হাৰত ক'ভিডৰ সংক্ৰমণ বাঢ়ি গৈ থাকিলে পৰিস্থিতি আৰু অধিক ভয়াৱহ হৈ পৰিব বুলি জানিবলৈ দি ক'ভিড -19 নিৰীক্ষণ বিষয়া দীপ কুমাৰ দেৱবৰ্মাই কয় যে, "ত্ৰিপুৰাত ক'ভিডৰ পজিটিভিটি ৰেটে ইতিমধ্যে গুৰুত্বপূৰ্ণ পাঁচ শতাংশৰ সীমা অতিক্ৰম কৰিছে ৷ যাৰ পৰিপ্ৰেক্ষিতত ক'ভিড -19 ব্যৱস্থাপনাৰ দায়িত্বত থকা লোক সকল অধিক চিন্তিত হৈ পৰিছে ৷ যদিহে একেই ধাৰা অব্যাহত থাকে আৰু সংক্ৰমণৰ প্ৰকৃত শৃংখলা পৰীক্ষা কৰা নহয় , তেন্তে অতি সোনকালে পৰিস্থিতি ভয়াবহ হৈ পৰিব ৷"
এখন যুটীয়া সংবাদমেল সম্বোধন কৰি দেৱবৰ্মাই কয় যে, অনাগত এক ডেৰমাহ সময় ৰাজ্যখনৰ বাবে যথেষ্ট গুৰুত্বপূৰ্ণ হ'ব, যিহেতু পজিটিভিটি ৰেটে ইতিমধ্যে অতি গুৰুত্বপূৰ্ণ পাঁচ শতাংশৰ সীমা অতিক্ৰম কৰিছে ৷ বিগত কিছুদিনৰ পৰা জি বি পি চিকিৎসালয়ত গুৰুতৰ অৱস্থাত ভৰ্তি হোৱা ক'ভিড ৰোগীৰ সংখ্যাও বৃদ্ধি পাইছে বুলি তেওঁ জানিবলৈ দিয়ে ৷
উল্লেখ্য যে, ক'ভিড-19 আটাইতকৈ বেছি সুবিধা থকা ৰাজ্যখনৰ আটাইতকৈ বৃহৎ চিকিৎসালয় জিবিপি হাস্পতালত বৰ্তমান 93 গৰাকী ৰোগী ভৰ্তি হৈ আছে ৷ ইয়াৰ ভিতৰত 50 শতাংশ ৰোগীৰ স্বাস্থ্যৰ অৱস্থা অতি সংকটজনক ৷ দেৱবৰ্মাই কয় যে, ৰোগী সকলৰ মাজত এতিয়া এনে পৰ্যায়ৰ সৃষ্টি হৈছে যে, কোনো লোকে শৰীৰত সৰু-সুৰা লক্ষণে দেখা দিলেও ভয় খাই জিবিপি হাস্পতাললৈ ধাপলি মেলে ৷
তেওঁ কয় যে, পৰাপক্ষত এনে কৰাটো উচিত নহয় ৷ কিয়নো ইয়াৰ ফলত গুৰুতৰ অৱস্থাত থকা ৰোগী সকল পাব লগীয়া চিকিৎসাৰ পৰা বঞ্চিত হোৱাৰ আশংকা থাকে ৷ দেৱবৰ্মাই জানিবলৈ দিয়া মতে, 2021 চনত ৰাজ্যখনত বৰ্তমানলৈকে 21 গৰাকী চিকিৎসাকৰ্মী ক'ভিডত আক্ৰান্ত হৈছে ৷
লগতে পঢ়ক: ত্ৰিপুৰাত ক'ভিড ৰোগীৰ প্ৰতিবাদ
