লখিমপুৰ: কেন্দ্রীয় বাজেটক লৈ বিভিন্ন প্ৰতিক্ৰিয়া চলি থকাৰ মাজতে বৃহস্পতিবাৰে লখিমপুৰত সংবাদমেল সম্বোধন কৰি শিক্ষা মন্ত্ৰী ডাঃ ৰণোজ পেগুৱে এই বাজেটে অসমৰ সৰ্বাংগীণ উন্নয়ন সাধনত অৰিহণা যোগাব বুলি দাবী কৰে । সংবাদমেলত তেওঁ বাজেটৰ বিভিন্ন দিশ ব্যাখ্যা কৰি অসম কেনেদৰে উপকৃত হ'ব সেই বিষয়ত আলোকপাত কৰে ।
চৰকাৰে গ্রহণ কৰা কেতবোৰ আঁচনিৰ যোগাত্মক দিশো তেওঁ আলোকপাত কৰে । তেওঁ কয়, "কেন্দ্রীয় বাজেটে অসমৰ সৰ্বাংগীণ বিকাশ সাধনত অৰিহণা যোগাব" ৷
বিশ্বৰ ভিতৰতে অসমত প্ৰথম বাঁহৰ পৰা প্ৰস্তুত হ'ব ইথানল
সংবাদমেলত মন্ত্রী ডাঃ ৰণোজ পেগুৱে কয়, "কেন্দ্রীয় বাজেটে অসমৰ সৰ্বাংগীণ বিকাশ সাধনত অৰিহণা যোগাব । শিক্ষা, স্বাস্থ্য, কৃষি, উদ্যোগ আদি সকলো দিশতে বাজেটখনে অসমৰ আৰু উত্তৰ-পূৰ্বাঞ্চলৰ উন্নয়ন সাধন কৰিব" ৷
বাজেটে উপকৃত কৰিব পৰা দিশসমূহ উল্লেখ কৰাৰ লগতে চৰকাৰে সামগ্ৰিকভাৱে বিভিন্ন ক্ষেত্রত ৰূপায়ণ কৰিবলৈ গ্ৰহণ কৰা আঁচনিসমূহৰ ওপৰতো তেওঁ ব্যাখ্যা আগবঢ়ায় । মন্ত্রীগৰাকীয়ে কয়, "পি এম ডিভাইন আঁচনিৰ অধীনত আমি কামৰূপ আৰু কামৰূপ মেট্ৰ'ত বিদ্যালয় নিৰ্মাণ কৰিছো । ইয়াৰ পুঁজি আৱণ্টন বৃদ্ধি কৰা হৈছে ৷ একেদৰে নেছিদৰ পুঁজিৰে বিদ্যালয়ৰ আন্তঃগাঁথনি সৃষ্টি হ'ব ৷ উদ্যমিতাৰ বাবে প্ৰধানমন্ত্ৰীৰ স্ব-নিয়োজন আঁচনিয়ে উপকৃত কৰিব ৷ কৃষিক্ষেত্ৰত আত্মনিৰ্ভৰ হোৱাৰ বাবে মাহজাতীয় শস্য উৎপাদনত চৰকাৰে গুৰুত্ব দিছে ৷ সৰিয়হ আৰু গোমধানক নগদ কৃষি হিচাপে প্ৰতিষ্ঠা কৰিব । বাজেটে গ্ৰীণ এনাৰ্জিক গুৰুত্ব দিছে । অসমত গ্ৰীণ এনাৰ্জিত বিনিয়োগ হ'ব" ৷
মন্ত্ৰীগৰাকীয়ে কয়, "বাঁহৰ পৰা ইথানল প্ৰস্তুত কৰাৰ আঁচনি লোৱা হৈছে । বিশ্বৰ ভিতৰত প্রথম অসমত বাঁহৰ পৰা ইথানল প্ৰস্তুত কৰা হ'ব । পৰৱৰ্তী সময়ত চাউল, মাকৈ আদিৰ পৰাও ইথানল প্ৰস্তুত কৰাৰ আঁচনি লোৱা হৈছে" ৷
শিক্ষাৰ ক্ষেত্ৰত চৰকাৰৰ আঁচনি
তেওঁ লগতে কয়, "আই টি আইৰ চাটিৰ্ফিকেটখন দশম শ্ৰেণীৰ সমপৰ্যায়ৰ হ'ব ৷ পলিটেকনিক পাছ কৰিলে আই আই টি আৰু অভিযান্ত্ৰিক শিক্ষা লাভ কৰিব পাৰিব । এ আই বিদ্যালয়ত ঐচ্ছিক বিষয়ৰ পাঠদান নৱম শ্ৰেণীৰ পৰা হ'ব । নৱম শ্ৰেণীৰ পৰা এ আই আৰু ৰ'ব'টিক শিক্ষা লাভ কৰিব পাৰিব । ইয়াৰ বাবে টাটাই হাব চেণ্টাৰ নিৰ্মাণ কৰিব ৷ কেইবছৰমানৰ বাবে তেওঁলোকে শিক্ষক নিয়োগ কৰি পৰৱৰ্তী সময়ত আমাৰ শিক্ষকৰ জৰিয়তে শিক্ষাদানৰ ব্যৱস্থা কৰা হ'ব" ৷
তেওঁ লগতে কয়, "অসমৰ ৩৪ খন পলিটেকনিকত উন্নত মানৰ কাৰিকৰী শিক্ষা প্ৰদান কৰা হ'ব । একেদৰে এইবৰ্ষৰ পৰা ৰ'ব'টিক শিকিবৰ বাবে বিদ্যালয়সমূহত ব্যৱস্থা কৰা হ'ব" ৷ সংবাদমেলত বাজেটখন অসমৰ বাবে যথেষ্ট উপযোগী বুলিও কয় মন্ত্ৰীগৰাকীয়ে । তেওঁ উল্লেখ কৰা মতে, আগন্তুক সময়ত ১১ টা বিভাগত কাৰিকৰী শিক্ষা দিয়াৰ ব্যৱস্থাও চৰকাৰে কৰিব । সংবাদমেলত বিজেপিৰ জিলা সভাপতি শ্যামল শৰ্মা উপস্থিত থাকে ।
লগতে পঢ়ক: ধেমাজিত আৰ্থ-সামাজিক বিকাশৰ ক্ষেত্ৰত স্বেচ্ছাসেৱী সংস্থা চেড'ৰ ভূমিকা - SEDO NGO
