গুৱাহাটী : একালৰ চিনেমা আৰু অসমীয়া ধাৰাবাহিকৰ বলিষ্ঠ অভিনেতা, নিৰ্দেশক, মেহতাব হুছেইনৰ পৰলোকপ্ৰাপ্তি ঘটে ৷ আজি গুৱাহাটীৰ এখন ব্যক্তিগত নাৰ্ছিং হোমত শেষ নিশ্বাস ত্যাগ কৰে বিশিষ্ট অভিনেতাগৰাকীয়ে ৷
মেহতাব হুছেইন অসমীয়া ছবিজগত আৰু অসমীয়া ধাৰাবাহিকৰ এগৰাকী বলিষ্ঠ অভিনেতা আছিল ৷ গুৱাহাটী দূৰদৰ্শনত প্ৰচাৰিত ‘‘মিতাৰ তিতা মিঠা’’ কমেডী ছিৰিয়েলখন নিৰ্মাণ কৰি তেখেতে দৰ্শকৰ পৰা বিপুল সঁহাৰি লাভ কৰিছিল ।
‘‘মিতাৰ তিতা মিঠা’’ আছিল অসমৰ প্ৰথম খুহুতীয়া (আজিৰ ভাষাত কমেডী) ধাৰাবাহিক । সেই সময়ত তেওঁ অসমৰ ৰাইজৰ মাজত বিপুলভাৱে জনপ্ৰিয় হৈ পৰিছিল মেহতাব কা নামেৰে ।
১৯৭৫ চনৰ ফেব্ৰুৱাৰীত মুক্তি লাভ কৰা পুলক গগৈ পৰিচালিত ব্লেক এণ্ড হোৱাইট ছবি ‘খোজ’ত নায়ক ৰূপে অভিনয় কৰিছিল মেহতাব হুছেইনে । অভিনয় কৰাৰ লগতে অসমীয়া ছবি নিৰ্মাণৰ বাবে আগৰণুৱা আছিল হুছেইন । কমেডী ছিৰিয়েল খিছিৰিত তেখেতে এজন কৌতুক অভিনেতা হিচাপে সুন্দৰ অভিনয় কৰি দৰ্শকৰ মন জয় কৰিবলৈ সক্ষম হৈছিল । ইয়াৰোপৰি মেহতাব হুছেইন অসমৰ প্ৰথমগৰাকী চাহ বিজ্ঞানৰ স্নাতক আছিল ।
ডিব্ৰুগড় সদৰৰ পৰা আহি গুৱাহাটীৰ চান্দমাৰীত স্থায়ীভাৱে বসবাস কৰিবলৈ লোৱা মেহতাব হুছেইন এগৰাকী চিনেমা, ধাৰাবাহিক জগতৰ উদ্যোগী হোৱাৰ লগতে বিভিন্ন ক্ষেত্ৰৰ সফল ব্যৱসায়ী আছিল ।
মৃত্যুৰ সময়ত মেহতাব হুছেইনে জ্যেষ্ঠ ভাতৃ বিশিষ্ট চিকিৎসক ডাক্তৰ জাকিৰ হুছেইন, পত্নী-পুত্ৰ আৰু কন্যাক এৰি থৈ গৈছে । মৃত্যুৰ সময়ত অভিনেতাগৰাকীৰ বয়স আছিল ৭৫ বছৰ । মেহতাব হুছেইনৰ পিতৃ আছিল মুহিবুদ্দিন আহমেদ আৰু মাতৃ আছিল ছফিয়া খাতুন ।
