'شھبندو ادھیکاری جس ڈال پر بیٹھتے ہیں اسی کو کاٹتے ہیں'

بی جے پی اپنے اعلیٰ رہنماؤں کی مدد سے مغربی بنگال میں روزانہ جلسہ و جلوس کے ذریعہ عوام کی توجہ اپنی جانب مبذول کرانے کی ہر ممکن کوشش میں مصروف ہے۔

مغربی بنگال میں منعقد ہونے والے اسمبلی انتخابات 2021 کی تاریخ جوں جوں قریب آ رہی ہے توں توں سیاسی سرگرمیوں میں اضافہ ہورہا ہے۔ سیاسی سرگرمیوں کے ساتھ ساتھ سیاسی رہنماؤں کے درمیان لفظی جنگ بھی عروج پر پہنچ چکی ہے۔ تمام سیاسی جماعتوں کے درمیان بیان بازی کا سلسلہ زوروں پر ہے۔

بی جے پی اپنے اعلیٰ رہنماؤں کی مدد سے مغربی بنگال میں روزانہ جلسہ و جلوس کے ذریعہ عوام کی توجہ اپنی جانب مبذول کرانے کی ہر ممکن کوشش میں مصروف ہے۔ وہیں لفٹ فرنٹ اور کانگریس اتحاد اپنی کھوئی ہوئی زمین واپس حاصل کرنے کے لئے کمرکس کر انتخابی میدان میں اتر چکے ہیں۔

دوسری طرف پارٹی بدلنے کے کھیل میں ابتدائی نقصان کا سامنا کرنے کے بعد ترنمول کانگریس اپنی پوری طاقت کے ساتھ حزب اختلاف جماعتوں پر ٹوٹ پڑی ہے۔ وزیر فرہاد حکیم نے کہا کہ شھبندو ادھیکاری کالی داس سے کم نہیں ہیں۔ وہ بھی جس ڈال پر بیٹھتے ہیں اسی کو کاٹنے لگتے ہیں۔

انہوں نے کہا 'دو جگہوں سے انتخاب لڑنے میں میں کیا برائی ہے۔ ممتا بنرجی دو کیوں دس جگہوں سے انتخابات لڑیں گی انہیں کون روک سکتا ہے۔ وزیراعظم نریندر مودی خود دو جگہ سے انتخاب لڑتے ہیں۔ بی جے پی کے بیشتر رہنما دو دو جگہوں سے انتخابات لڑتے ہیں۔ جہاں تک شھبندو ادھیکاری کے ممتا بنرجی کو پچاس ہزار ووٹوں سے شکست کے چیلنج کی بات ہے تو یہ ممکن نہیں ہے'۔

کولکاتا میونسپل کارپوریشن ایڈمنسٹریٹو بورڈ کے چیئرمین فرہاد حکیم کے مطابق شھبندو ادھیکاری کو خود سیف سیٹ کی تلاش ہے۔ انہون نے کہا وہ دوسری جگہوں سے انتخاب جیت کر دیکھائیں اس کے بعد بات کریں۔

واضح رہے کہ گزشتہ روز ترنمول کانگریس کی سربراہ ممتا بنرجی کے نندی گرام سے انتخاب لڑنے کے اعلان کے بعد شبھندو ادھیکاری نے انہیں پچاس ہزار ووٹوں سے شکست دینے کا چیلنج کیا ہے۔