بنگال کے عوام پر نڈا اور شاہ کی باتوں کا اثر پڑنے والا نہیں ہے: فرہاد حکیم

مغربی بنگال کے ریاستی وزیر فرہاد حکیم نے کہا کہ مغربی بنگال کے عوام بی جے پی کے قومی صدر جے پی نڈا اور وزیر داخلہ امت شاہ کے باتوں میں نہیں آئیں گے۔

مغربی بنگال کی حکمراں جماعت ترنمول کانگریس کے رہنما اور وزیر فرہاد حکیم نے بی جے پی کے قومی صدر جے پی نڈا کو شدید تنقید کا نشانہ بنایا۔

وزیر فرہاد حکیم نے کہا کہ جے پی نڈا ایک پارٹی کے صدر ہی،ں وہ کچھ بھی بول سکتے ہیں۔ سمجھنے کی ضرورت ہے کہ ان کی باتوں میں کتنی سچائی ہے۔

انہوں نے کہا کہ بی جے پی کے قومی صدر جے پی نڈا ہر دوسرے دن بنگال کے دورے پر آ رہے ہیں۔ ان کے دوروں سے کچھ بھی فرق پڑتا نظر نہیں آ رہا ہے۔

فرہاد حکیم نے کہا کہ بی جے پی کے قومی صدر جے پی نڈا کے کہنے سے بنگال کے عوام پر کوئی اثر نہیں پڑتا ہے۔ ترنمول کانگریس کے رہنما کا کہنا ہے کہ سوچنے کی بات ہے کہ جے پی نڈا کے جلسے میں لوگوں کی بھیڑ نہیں ہو رہی ہے۔ لوگوں کو سمجھ میں آ گیا ہے کہ یہ پارٹی صرف بولنے والی ہے۔

انہوں نے کہا کہ امت شاہ اور جے پی نڈا کی نظروں میں اپوزیشن کے لوگ ہر بدعنوانی کے معاملے میں ملوث ہوتے ہیں۔ ان کے بارے میں کچھ بھی نہیں کہنا ہے کیونکہ انہیں عوام جواب دے گی۔

فرہاد حکیم نے کہا کہ اسمبلی انتخابات تک ہی بیرونی ریاستوں کے لوگوں کے آنے کا سلسلہ جاری رہے گا۔ اس کے بعد وہ کئی برسوں تک نظر نہیں آئیں گے۔

انہوں نے کہا کہ مغربی بنگال کے گورنر جگدیپ دھنکر کا تبادلہ کر دینا چاہیے کیونکہ وہ اب امت شاہ کی زبان بولنے لگے ہیں۔