مغربی بنگال کے شمالی 24 پرگنہ ضلع کے الٹا ڈانگہ علاقے میں منعقد ایک تقریب کے دوران وزیر فرہاد حکیم نے کہا کہ بنگال کے عوام کا بی جے پی کی قیادت والی مرکزی حکومت پر 85 ہزار کروڑ روپے بقایا ہے۔
یہ کوئی چھوٹی موٹی رقم نہیں ہے، اس سے بہت کچھ کیا جا سکتا ہے لیکن سیاسی انتقام کے تحت ریاست کے تمام فنڈ کو روک کر رکھا گیا ہے، انہوں نے کہا کہ بی جے پی کی قیادت والی مرکزی حکومت بنگال کے عوام کی قرض دار ہے، بار بار اپیل کرنے کے باوجود مرکزی حکومت بقیہ رقم دینے کے موڈ میں نہیں ہے۔
وزیر کا کہنا ہے کہ اس کے باوجود ممتا بنرجی کی قیادت والی ریاستی حکومت اپنے خرچ پر فلیٹ بنا کر دے گی، اس کے علاوہ حکومت کی جانب سے چلنے والے تمام ترقیاتی منصوبے بدستور جاری رہیں گے، اس کے ہم پابند ہیں۔
شہری ترقیاتی وزیر فرہاد حکیم ریاستی حکومت کی رہائش گاہ اسکیم کے تحت 180 لوگوں کو فلیٹ کی چابی سونپی، انہوں نے کہا کہ اس وقت 140 لوگوں کو فلیٹ دیا گیا اور مستقبل میں اور کئی لوگوں کو رہنے کے لیے فلیٹ دیا جائے گا۔
وزیر نے کہا کہ اب تک 580 لوگوں کو فلیٹ دیا جا چکا ہے، اس کے لیے بی جے پی کی قیادت والی مرکزی حکومت سے ایک روپیہ بھی نہیں لیا گیا ہے، ریاستی حکومت نے اپنے خرچ سے غریبوں کو فلیٹ دیا ہے اور دے رہی ہے نیز مستقبل میں بھی اس سلسلے کو برقرار رکھنے کی کوشش کی جائے گی۔