Bengal Panchayat Election مغربی بنگال میں پرتشدد واقعات کے درمیان پنچایت انتخابات کے لئے پولنگ جاری

مغربی بنگال پنچایت الیکشن 2023 کے لیے آج ووٹنگ جاری ہے۔ ریاست میں وسیع حفاظتی انتظامات کے درمیان مختلف اضلاع میں تشدد کی اطلاعات موصول ہوئی ہیں۔ اسی دوران صبح سے ہی پولنگ بوتھ پر ووٹروں کی قطاریں دیکھنے کو مل رہیں ہیں۔

کولکاتا: مغربی بنگال میں 22 اضلاع میں سخت سیکویرٹی انتظامات کے درمیان پنچایت انتخابات 2023 کے لئے ووٹنگ کا سلسلہ جاری ہے ۔ انتخابات شروع ہونے سے چند گھنٹے قبل ریاست کے کچھ حصوں میں تشدد کی اطلاعات موصول ہوئی تھیں۔ووٹنگ صبح سات بجے شروع ہوئی۔ انتخابات شروع ہونے سے قبل پولنگ بوتھ کے باہر ووٹرز کی لمبی قطاریں دیکھی گئیں۔

کوچ بہار میں، کانگریس-سی پی آئی ایم اتحاد کے ایک کارکن کو مبینہ طور پر ٹی ایم سی کے حامیوں نے گولی مار دی۔ اسے تشویشناک حالت میں ہسپتال میں داخل کرایا گیا ہے ۔وہ ڈنہٹا سب ڈویژنل اسپتال میں زیر علاج ہے۔ متاثرہ نے واقعے کے بعد میڈیا میں بیان دیا۔ انہوں نے براہ راست ٹی ایم سی لیڈر پر حملے کا الزام لگایا۔

دوسری طرف مرشد آباد کے شمشیر گنج علاقے میں ٹی ایم سی اور کانگریس کارکنان کے درمیان خونی جھڑپ کی اطلاع ہے۔مالدہ،شمالی دیناج پور سمیت دیگر اضلاع میں سیاسی جماعتوں کے حامیوں کے درمیان جھڑپوں کی اطلاعات ہیں۔

مغربی بنگال میں آج پنچایتی انتخابات 2023 ہیں۔ ریاست میں انتخابات کے اعلان کے بعد سے تشدد میں کم از کم 15 افراد کے ہلاک ہونے کی اطلاع ہے۔ گورنر نے اس معاملے پر الیکشن افسر کو خط لکھا۔ بنگال میں تقریباً 5.5 لاکھ ووٹر اپنے حق رائے دہی کا استعمال کریں گے۔ ریاست میں ضلع پریشد، پنچایت سمیتی اور گرام پنچایت کے لیے انتخابات ہو رہے ہیں۔

انتخابی عہدیداروں کے مطابق ریاست میں پنچایتی انتخابات کے سلسلے میں سیکورٹی کے وسیع انتظامات کئے گئے ہیں۔ کسی بھی ناخوشگوار واقعے سے نمٹنے کے لیے تقریباً 65 ہزار مرکزی پولیس فورس کو تعینات کیا گیا ہے۔ اس کے علاوہ ریاست کے تقریباً 70 ہزار پولیس اہلکار نظم و نسق کو برقرار رکھنے میں مصروف ہیں۔