ترنمول کانگریس کے جلسہ گاہ پر حملہ، متعدد افراد زخمی

ہگلی ضلع کے آرام باغ کے سودپور علاقے میں ترنمول کانگریس کے کمبل تقسیم کی تقریب کے دوران نامعلوم شرپسندوں نے حملہ کر دیا جس کے سبب متعدد افراد زخمی ہو گئے۔

مغربی بنگال میں منعقد ہونے والے اسمبلی انتخابات2021 کی تاریخ جوں جوں فریب آ رہی ہے توں توں سیاسی جماعتوں کے حامیوں کے درمیان جھڑپوں میں تیزی آنے لگی ہے۔

حکمراں جماعت ترنمول کانگریس اور بی جے پی کے حامیوں کے درمیان جاری خونی تصادم کا دائرہ اب ریاست کے تمام اضلاع تک پھیل چکا ہے۔

گزشتہ دو مہینوں کے دوران ریاست کے مختلف اضلاع میں ہونے والی جھڑپوں میں اب تک پچاس سے زائد لوگوں کی موت ہو چکی ہے جبکہ سینکڑوں افراد زخمی ہوئے ہیں۔

مغربی بنگال کے ہگلی ضلع کے آرام باغ کے سودپور علاقے میں ترنمول کانگریس کے کمبل تقسیم کی تقریب کے دوران نامعلوم شرپسندون نے حملہ کر دیا۔شرپسندوں نے حملے میں جلسہ گاہ میں توڑ پھوڑ کی اور وہاں غریبوں میں تقسم کیے جانے والے کمبل کو اٹھا کر اپںے ساتھ لے گئے۔

نامعلوم شرپسندوں کے حملے میں متعدد افراد زخمی ہو گئے۔اس واقعے کے خلاف ترنمول کانگریس کے حامیوں نے ناکہ بندی کر دی جس سے آمدورفت پوری طرح ٹھپ پڑ گئی۔

پولیس نے جائے وقوع پر پہنچ کر حالات کو قابو میں کیا اور ناکہ بندی ختم کروا کر آمدورفت دوبارہ بحال کرائی۔پولیس کا کہنا ہے کہ پورے معاملے کی تفتیش کی جا رہی ہے لیکن اب تک کسی کی گرفتاری عمل میں نہیں آئی ہے۔

ہگلی ضلع ترنمول کانگریس پریشد کے صدر محبوب رحمن کا کہنا ہے کہ بی جے پی کے حامیوں نے اس حملے میں ملوث ہیں۔

انہوں نے کہا کہ اس حملے میں ملوث شرپسندوں کی جب تک گرفتاری عمل میں نہیں آتی اس وقت تک احتجاج کا سلسلہ جاری رہے گا۔ بی جے پی کے ترنمول کانگریس کے الزام کو بے بنیاد قرار دیا۔