مغربی بنگال میں ان دنوں نوبل انعام یافتہ ڈاکٹر امرتیہ سین اور شانتی نیکیتن کی ایک گز کی زمین کو لے بڑے پیمانے پر سیاست کی جا رہی ہے اس معاملے میں بنگال کی سیاست دو حصوں میں تقسیم ہو گئی ہے۔
حکمراں جماعت ترنمول کانگریس، لیفٹ فرنٹ اور کانگریس ڈاکٹر امرتیہ سین کی حمایت میں ہیں جبکہ بی جے پی ان کے خلاف کھڑی ہے۔
مغربی بنگال کے ریاستی وزیر فرہاد حکیم نے کہا کہ نوبل انعام یافتہ برائے معاشیات ڈاکٹر امرتیہ سین کے خلاف کچھ بھی کہنے سے پہلے دس بار سوچنے کی ضرورت ہے وہ ملک کے ہیرو ہیں اگر کوئی اس بات کو تسلیم نہیں کرتا ہے تو کوئی برائی نہیں لیکن غلط بیان بازی سے کسی کو بدنام نہ کریں۔
انہوں نے کہا کہ بی جے پی کے ریاستی صدر دلیپ گھوش سیاسی فائدے کے لیے کچھ بھی کہہ سکتے ہیں۔ انھوں نے امرتیہ سین کو زمین کے کاغذات دکھانے کی بات کہی ہے شاید وہ بھول گئے ہیں کہ ڈاکٹر امرتیہ سین کس مقام پر ہیں۔
فرہاد حکیم نے مزید کہا کہ ڈاکٹر امرتیہ سین نوبل انعام کے ذریعہ حاصل ہونے والی رقم سے فاؤنڈیشن چلاتے ہیں اور اپنی ساری کمائی غریبوں کی مدد کے لیے وقف کر چکے ہیں جبکہ بی جے پی کے ریاستی صدر انہیں ثبوت پیش کرنے کو کہ رہے ہیں۔
انھوں نے یہ بھی کہا کہ آج نوبل انعام یافتہ ڈاکٹر امریتہ سین کے بارے میں کہا جا رہا ہے،کل نوبل انعام یافتہ اور قومی ترانہ کے بانی رابندر ناتھ ٹیگور، نیتاجی سبھاش چندر بوس، قاضی نذرالاسلام کے بارے میں بولا جائے گا۔
واضح رہے کہ وشوا بھارتی یونیورسٹی کے وائس چانسلر بدوت چکرورتی نے ڈاکٹر امرتیہ سین کو شانتی نیکیتن کی ایک گز کی زمین پر مبینہ قبضہ کرنے کو لے کر نوٹس بھیجا تھا۔اسی نوٹس کو لے کر بنگال کی سیاست میں ہلچل مچی ہے۔ دانشوران،ادیب اور فنکار سمیت متعدد بڑی بڑی شخصیات امرتیہ سین کی حمایت میں تحریک چلا رہے ہیں۔
