گورنر سے ملاقات سے قبل نومنتخب ایم ایل اے کے ساتھ ممتا کی میٹنگ

مغربی بنگال کے گورنر جگدیپ دھنکھڑ سے ملاقات سے پہلے وزیراعلیٰ و ترنمول کانگریس سربراہ ممتا بنرجی آج پارٹی دفتر میں نومنتخب ممبران اسمبلی کے ساتھ اہم میٹنگ کریں گی۔

گورنر دھنکھڑ کو بتایا گیا ہے کہ محترمہ بنرجی ان سے شام سات بجے راج بھون میں ملاقات کریں گی۔ ریاست میں 292 اسمبلی سیٹوں پر ہوئے الیکشن میں 214 سیٹوں پر صرف اپنے دم پر جیت حاصل کرکے اپنی پارٹی کو مسلسل تیسری مرتبہ اقتدار میں پہنچانے کا کریڈٹ صرف محترمہ بنرجی کو جاتا ہے۔

محترمہ بنرجی نے یہ کارنامہ نندی گرام میں 10 مارچ کو الیکشن کے پرچار کے دوران زخمی ہونے کے بعد کیا۔ وہ دو روز تک ہسپتال میں داخل رہیں لیکن اس کے بعد انہوں نے وھیل چیئر کی مدد سے الیکشن کی ریلی کی کمان سنبھالی۔ اس طرح اپنے دم پر انہوں نے پارٹی کی پوری مہم کو سنبھالا جبکہ ان کی اپوزیشن بھارتیہ جنتا پارٹی کے وزیراعظم نریندر مودی اور مرکزی وزیر داخلہ امت شاہ نے اس الیکشن میں اپنی پوری طاقت لگا دی تھی۔

نندی گرام سیٹ سے محترمہ بنرجی کو ہراکر الیکشن جیتنے والے بی جے پی امیدوار شیوندو ادھیکاری نے کہا کہ ’’ مجھے اس طرح کے بڑے نتائج کی امید نہیں تھی اور لوگوں کو ایک مرتبہ پھر مجھ پر اعتماد ظاہر کرنے کے لئے میں آپ سب کا شکریہ ادا کرتا ہوں۔ محترمہ بنرجی نے کہا ’’ مجھے ڈبل ٹن (200) دینے اور ڈبل انجن بی جے پی سرکار کو مسترد کرنے کے لئے شکریہ ادا کرتی ہوں۔محترمہ بنرجی تقریباً چار بجے پارٹی دفتر میں میٹنگ کی صدارت کریں گی۔ وہ گورنر سے ملاقات سے پہلے اس اہم اجلاس سے خطاب کریں گی ، جس میں کورونا سے متعلق ضابطوں پر بھی مکمل طور پر عمل کیا جائے گا۔

اس بیچ الیکشن کمیشن نے ترنمول کی طرف سے نندی گرام میں پھر سے ووٹوں کی گنتی کرانے کی مانگ کو مسترد کردیا ہے۔

یواین آئی