مغربی بنگال: پولپور میں ممتا بنرجی کا پیدل روڈ شو

مغربی بنگال کی وزیراعلی ممتا بنرجی نے بیر بھوم ضلع کے بولپور میں پیدل روڈ شو کی قیادت کی جس میں اندازاً ایک لاکھ سے زائد افراد نے شرکت کی۔

مغربی بنگال کے بیر بھوم ضلع ان دنوں سیاسی جماعتوں کی سرگرمیوں اور وشوا بھارتی یونیورسٹی کی وجہ سے کافی سرخیوں میں ہے۔

اس علاقے میں گزشتہ 20 دسمبر کو مرکزی وزیر داخلہ امت شاہ کی سیاسی ریلی کے بعد وزیراعلی ممتا بنرجی نے روڈ شو کی قیادت کرکے اپنی طاقت کا مظاہرہ کیا۔

بولپور سے جامبونی تک چار کلومیٹر کے روڈ شو میں ٹی ایم سی کے رکن پارلیمان ستابدی رائے، بیر بھوم ترنمول کانگریس ضلع صدر انو براتا منڈل سمیت تمام اعلیٰ رہنماؤں نے شرکت کی۔

چار کلومیٹر طویل اس پیدل روڈ شو کی سب سے خاص بات یہ رہی کہ ممتا بنرجی کے ساتھ تقریباً سوا لاکھ لوگوں نے حصہ لیا۔

مغربی بنگال کی تاریخ میں پہلی مرتبہ ایسا ہوا ہے کہ کسی سیاسی رہنما کے پیدل روڈ شو میں ایک لاکھ سے زائد افراد نے شرکت کی ہو۔

مغربی بنگال اسمبلی انتخابات کے پیش نظر سیاسی سرگرمیاں عروج پر ہیں اور اسی علاقے میں گزشتہ روز مرکزی وزیر داخلہ امت شاہ نے بھی روڈ شو کیا تھا جس میں بڑی تعداد میں پارٹی کارکنان نے شرکت کی تھی۔