ممتا بنرجی کی بی جے پی پر تنقید

مغربی بنگال کی وزیراعلی ممتا بنرجی نے کہا کہ مذہب کے نام پر سیاست کرنے والوں کو بیرونی کہا جاتا ہے عام لوگوں کو نہیں، اس پر کسی کو سیاست کرنے کی ضرورت نہیں ہے۔

مغربی بنگال میں آئندہ اسمبلی انتخابات سے قبل سیاسی سرگرمیاں عروج پر ہیں اور حکمراں جماعت ترنمول کانگریس اور بی جے پی کے رہنماؤں کے درمیان لفظی جنگ جاری ہے۔ جس کے سبب سیاسی گراف بلندیوں پر پہنچ چکا ہے۔

مرکزی وزیر داخلہ امت شاہ سمیت بی جے پی کے تمام اعلیٰ رہنما حکمراں جماعت ترنمول کانگریس پر جم کر تنقید کر رہے ہیں۔

وزیراعلی ممتا بنرجی دو دنوں کے دورے پر بیر بھوم پہنچی اور دورے کے پہلے دن ضلع مجسٹریٹ سمیت دیگر اعلیٰ حکام سے ملاقات کی۔ اس دوران وزیراعلی نے ضلع انتظامیہ کے افسران سے ترقیاتی منصوبوں کے بارے میں تبادلہ خیال کیا۔

ممتا بنرجی نے کہا کہ بیرونی ریاستوں کے رہنما الفاظ کے استعمال پر کسی کو کوئی اعتراض نہیں ہونا چاہئے۔ سب کو معلوم ہے کہ کون کس کو کیا کہتا ہے لیکن بی جے پی کے رہنماؤں کو ہر چیز میں سیاست کرنے کی عادت پڑ گئی ہے۔

انہوں نے کہا کہ ملک کی دوسری ریاستوں سے تعلق رکھنے والے سیاسی رہنماؤں کے لیے بیرونی لفظ کا استعمال کیا گیا تھا نا کہ عام عوام کے لیے۔

ممتا نے مزید کہا کہ ملک میں رہنے والے لوگ اپنی مرضی سے کسی بھی وقت کہیں بھی آنے جانے کے لئے آزاد ہیں کیونکہ ملک کا ہر باشندہ بھارتی کہلانے کے قابل ہے وہ چاہے کسی بھی مذہب سے تعلق رکھتا ہو۔

ممتا بنرجی نے کہا کہ مذہب کے نام پر سیاست کرنے والوں کے لیے بیرونی لفظ کا استعمال کیا گیا ہے اور مستقبل میں بھی کیا جائے گا۔ چند لوگ ہی ریاست میں اُتھل پُتھل مچائے ہوئے ہیں۔ وہ لوگ سب کچھ بدلنا چاہتے ہیں۔تاریخ بدلنا چاہتے ہیں۔ ان لوگوں کو یہ برا لگے گا ہی۔

واضح رہے کہ گزشتہ بیس دسمبر کو وزیر داخلہ امت شاہ نے بیر بھوم کے بولپور میں روڈ شو کیا تھا اسی کے جواب ممتا بنرجی آئندہ بدھ کے روز روڈ شو کی قیادت کریں گی۔