مغربی بنگال کے گورنر جگدیپ دھنکرنے آج ترنمول کانگریس کے رکن پارلیمان کلیا ن بنرجی کو چار صفحاتی خط لکھ کر کہا ہے کہ کورونا وائرس کے دور میں ترنمول کانگریس کے رہنما ان پر حملہ کرکے اپنی ناکامیوں کو چھپانے کی کوشش کررہے ہیں۔
خیال رہے کہ سیرام پور سے رکن پارلیمان کلیان بنرجی نے گورنر کی تنقید کرتے ہوئے کہا تھا کہ دھنکر بی جے پی کیلئے کام کرتے ہیں۔
گورنر نے چار صفحاتی خط کو اپنے ٹوئیٹر اکاؤنٹ پر شیئر بھی کیا ہے۔ اس خط میں گورنر نے الزام عاید کیا ہے کہ انہوں نے حکومت کے ساتھ مل کر کام کرنے کی بھر پور کوشش کی اور گزشتہ سال جولائی میں عہدہ سنبھالنے کے بعد بھی آپ کو یعنی کلیان بنرجی کو فون کرکے راج بھون آنے کی دعوت دی اور سیرامپور میں بھی جب میں پوجا کیلئے گیا تو بھی آپ کو فون کیا تھا مگر آپ نے کوئی رد عمل نہیں دیا۔
اس سے قبل گورنر نے آج ٹوئیٹ کرتے ہوئے کہا ہے کہ یہ وقت گورنر اور پھر مرکزی حکومت کے خلاف چاقو نکالنے کا وقت نہیں ہے۔ اس وقت حکومت کو اپنے کام کاج پر توجہ دینے کی ضرورت ہے۔
