کولکاتا: مغربی بنگال کے گورنر سی وی آنند بوس نے کہا کہ یونیورسٹی کے مستقل وائس چانسلر کے انتخاب کے لیے مجوزہ سرچ کمیٹی کے ارکان کے نام سپریم کورٹ کو بھیج دیے ہیں۔ تاہم گورنر نے اس سوال کا جواب نہیں دیا کہ راج بھون کی جانب سے سرچ کمیٹی کے لیے جن افراد کے نام بھیجے گئے ہیں وہ اس ریاست کے باشندے ہیں یا نہیں۔ 15 ستمبر کو سپریم کورٹ نے زبانی طور پر کہا تھا کہ ریاست کی یونیورسٹیوں میں وائس چانسلرز کی تقرری کے لیے ایک سرچ کمیٹی بنائی جائے گی۔ عدالت کی جانب سے بتایا گیا کہ یہ کمیٹی 25 ستمبر کو تشکیل دی جائے گی۔
عدالت نے تینوں فریق یعنی ریاست، گورنر اور یونیورسٹی گرانٹس کمیشن (یو جی سی) کو سرچ کمیٹی کے ارکان کو نامزد کرنے کے لیے پانچ نام پیش کرنے کی ہدایت دی تھی۔ جسٹس سوریہ کانت اور جسٹس دیپانکر دتہ کی ڈویژن بنچ نے کہا کہ ارکان کے نام جاننے کے بعد تین رکنی سرچ کمیٹی تشکیل دی جائے گی جس میں ہر طرف سے برابر ارکان ہوں گے۔ یہ کمیٹی ریاستی یونیورسٹیوں کے مستقل وائس چانسلرز کے ناموں کی سفارش کرے گی۔