کولکاتا:مغربی بنگال کے گورنر سی وی آنند بوس نے ترنمول کانگریس کے وفد کو یقین دلایا ہے کہ وہ آئندہ 24 گھنٹوں کے اندر مرکزی حکومت کے متعلقہ حکام سے ترنمول کی طرف سے اٹھائے گئے مسائل کے بارے میں بات کریں گے۔
ملاقات کے دوران انہوں نے کہا کہ وہ اس بات کو یقینی بنانے کی کوشش کریں گے کہ مغربی بنگال کے لوگ محروم نہ رہیں۔ترنمول کانگریس کا وفد شام 4 بجے راج بھون میں پہنچا۔گورنر سے ملاقات کے دوران ترنمول کانگریس نے کہا کہ 100دن کام اسکیم کی رقم نہیں ملنے کی وجہ سے دیہی علاقوں کے عام ورکروںکو شدید مشکلات کا سامنا ہے۔
ابھیشیک نے دعویٰ کیا کہ قانون کے مطابق اگر رقم کی ادائیگی میں تاخیر ہوتی ہے تو ایک خاص شرح پر سود ادا کرنا ہوگا۔ محروموں کو یہ رقم ادا کرنی چاہیے۔ ابھیشیک نے کہا کہ وہ گورنر کے ذریعے مرکزی حکومت تک یہ باتیں پہنچانا چاہتے ہیں۔گورنر کے ساتھ میٹنگ کے دوران ترنمول کانگریس نے اس اسکیم سے استفادہ کرنے والوں کے خطوط اور میمورنڈم بھی سونپا ہے۔ میٹنگ کے بعد ممبر پارلیمنٹ نے سوگت رائے نے کہاکہ ’’میٹنگ اچھی رہی۔‘‘
گورنر اتوار کی رات شمالی بنگال اور دہلی کا دورہ کرنے کے بعد کلکتہ واپس آئے ہیں ۔ واپسی پر، انہوں نے کہا تھا کہ کوئی بھی ان سے ملنے آ سکتا ہے، لیکن انہیں امن و امان کی تعمیل میں ان سے ملنے ضرور آنا چاہیے۔ انہوں نے کہاکہ میرے پاس ترنمول کے 3 نمائندے آئے تھے۔انہوں نے کہا کہ وہ چاہتے ہیں کہ میں راج بھون میں ان کے لیڈر سے ملوں۔ میں نے انہیں دارجلنگ میں راج بھون آنے کی دعوت دی تھی۔ لگتا ہے وہ یہاں نہیں آنا چاہتے ہیں۔ میں سمجھتا ہوںکہ وہ کیوں نہیں آنا چاہتا ہے ۔