Mamata Banerjee جادو پور یونیورسٹی میں طالب علم کی مشتبہ موت پر وزیراعلیٰ ناراض

وزیر اعلیٰ ممتا بنرجی نے سخت ناراضگی ظاہر کرتے ہوئے کہا کہ جادو پوریونیورسٹی جیسے ملک کے معزز ادارے میں اگر ریکنگ کی شکایت آتی ہے یہ ناقابل قبول ہے۔

کولکاتا:مغربی بنگال کے دارالحکومت کولکاتا کے قریب واقع جادو پوریونیورسٹی میں طالب علم کی موت کے معاملے میں وزیر اعلیٰ ممتا بنرجی نے سخت ناراضگی ظاہر کرتے ہوئے کہا کہ جادو پوریونیورسٹی جیسے ملک کے معزز ادارے میں اگر ریکنگ کی شکایت آتی ہے یہ ناقابل قبول ہے۔ ترنمول کانگریس کے ترجمان کنال گھوش نےکہا کہ جادوپور میں جو واقعہ ہوا اس میں ریگنگ کے الزامات سامنے آئے ہیں۔ یہ انتہائی افسوس ناک واقعہ ہے۔ وزیر اعلیٰ بہت ناراض ہیں۔ انہوں نے کہا کہ نئے طالب علموں کو خوف زدہ ہونے کی ضرورت نہیں ہے۔ملزمین کی جلد سے جلد شناخت کرکے سزا دی جانی چاہیے۔

کنال گھوش نے کہاکہ ہاسٹل میں ہر ایک کو تعاون کرنا چاہیے۔ اس معاملے میں ملوث کسی بھی شخص کو بخشا نہیں جائے گا۔جادو پوریونیورسٹی میں بنگلہ شعبہ میں پہلے سال کے طالب علم سوپندیپ تین منزلہ بالکونی سے کیسے گرا، اس نے کپڑے کیوں نہیں پہنے ہوئے تھے؟ طالب علم دوپہر سے ہی عجیب و غریب حرکت کیوں کر رہا تھا؟ واقعے کو 24 گھنٹے گزر گئے لیکن کسی کے پاس کوئی جواب نہیں ہے۔ کچھ کا کہنا ہے کہ طالب علم نے کارنیس سے چھلانگ لگا کر خودکشی کی، کچھ کا کہنا ہے کہ یہ واقعہ ریگنگ کی وجہ سے پیش آیا۔ تاہم، سبھی اس بات پر متفق ہیں کہ بدھ کی رات کچھ غیر معمولی واقعہ ہوا تھا۔

جادوپور تھانے کی پولیس نے پہلے ہی جادو پور کے کچھ طالب علموں کو تھانے بلا کر ان سے پوچھ گچھ کی ہے۔ انہوں نے دعویٰ کیا کہ سوپندیپ کو مسلسل تین دنوں سے ہم جنس پرست ہونے کی وجہ سے ہراساں کیا جا رہا تھا۔ مختلف اوقات میں اسے ہاسٹل کی بالکونی میں برہنہ گھومنے کو کہا گیا تھا۔ انہیں برہنہ رقص کرنے پر بھی مجبور کیا گیا۔ اس کے علاوہ اسے مختلف اوقات میں جسمانی اور ذہنی طور پر ہراساں کیا جا رہا تھا، جس کی وجہ سے سوپندیپ پریشان تھا۔ پولیس پورے واقعہ کی تحقیقات کر رہی ہے۔