جمعہ کو ممتاکی عظیم الشان ریلی کا اعلان

ریاستی وزیر اعلیٰ ممتابنرجی نے شہریت ترمیمی ایکٹ ، این آرسی اور این پی آر کے خلاف شمالی 24 پرگنہ کے نئی ہٹی میں جمعہ کو عظیم الشان ریلی کی قیادت کرنے کا اعلان کیا۔

مغربی بنگال کی وزیر اعلیٰ ممتابنرجی نے بی جے پی کی قیادت والی مرکزی حکومت کی جانب سے منظور شدہ شہریت ترمیمی ایکٹ ، آین آرسی اور این پی آر کے خلاف جنگ کا جاری رکھنے کااعلان کیا۔

مسلمانوں کی گھنی آبادی والا علاقہ راجہ بازار میں شہریت ترمیمی ایکٹ، این آرسی اور این پی آر کے خلاف احتجاجی ریلی کو خطاب کرتے ہوئے وزیراعلیٰ نےکہاکہ مرکزی حکومت کی غلط پالیسی کی وجہ سے لوگوں کو دشواریوں کا سامنا کرنا پڑ رہا ہے۔

انہوں نے کہاکہ بی جے پی کی قیادت والی مرکزی حکومت کی عوام دشمن پالیسی کے خلاف ہماری تحریک جاری رہے گی۔ میں بنگال کے عوام سے احتجاج کاسلسلہ جاری رکھنے کی اپیل کرتی ہوں۔

ترنمول کانگریس کی سربراہ نے کہاکہ شمالی 24 پرگنہ کے نئی ہٹی تھانہ علاقے میں جمعہ نماز بعد شہریت ترمیمی ایکٹ ، این آرسی اور این پی آر کے خلاف عظیم الشان ریلی کی قیادت کرنے کا اعلان کررہی ہوں۔

ممتابنرجی نے کہاکہ جمعہ کے دن سے میں بی جے پی کی قیادت والی مرکزی حکومت کے خلاف اعلیٰ سطح پر احتجاج کرنے کا اعلان کررہی ہوں۔ مجھے بی جے پی کے خلاف تحریک جاری رکھنے میں عوام کی مدد کی ضرورت ہوگی۔

انہوں نے کہاکہ بی جے پی کی حکومت نے عوام دشمن پالیسی کو ملک بھر نافذ کرنے کا اعلان کیا ہے۔ اگر آج ہم اس کے خلاف آواز بلند نہیں کریں گے تو ہماری آنے والی نئی نسل کا مسبقتل سیاہ ہونے کا خدشہ ہے۔

محترمہ ممتابنر جی کے مطابق مغربی بنگال کے 294 اسمبلی حلقوں میں بی جے پی کے خلاف احتجاجی ریلیوں کی قیادت کرنے کااعلان کیاہے۔ بی جے پی کو اب کسی بھی قیمت پر بخشا نہیں جائے گا۔

انہوں نے کہاکہ بنگال میں رہنے والے تمام لوگ بھارتی ہیں انہیں کسی شہریت ثابت کرنے کی کوئی ضرورت نہیں ہے۔

ممتاکے مطابق وزیراعظم نریندر مودی شہریت ترمیمی ایکٹ اور این آرسی پر کچھ کہتے ہیں ۔ امت شاہ کچھ اور کہتے ہیں۔ لوگوں کو سمجھناچاہیے کہ ان کے ساتھ مستقبل میں کیا ہونے والا ہے ۔

انہوں نے کہاکہ وہ جھارکھنڈ میں نئی حکومت کی تشکیل اور وزیراعلیٰ کی حلف برداری تقریب میں شرکت کرنے کے لیے جاؤں گی۔ وہاں سے آنے کے بعد مرکزی حکومت کے خلاف اسی تحریک چلے گی اس میں کئی سیاسی رہنماؤں کے مستقبل ختم ہوجائےگا۔