مغربی بنگال میں سات مقامات پر سی بی آئی کے چھاپے

ریاست کے ضلع بردوان میں سات مختلف مقامات پر سی بی آئی کی ٹیم نے کوئلہ اسمگلنگ کے معاملے میں خصوصی تلاشی مہم چلائی ہے۔

مغربی بنگال میں چار مہینے بعد منعقد ہونے والے اسمبلی انتخابات سے قبل سیاسی جماعتوں کی سرگرمیوں کے ساتھ ساتھ خفیہ ایجنسیوں کی کارروائیوں میں بھی اضافہ ہوگیا ہے۔

گزشتہ چند مہینوں کے دوران مغربی بنگال میں سی بی آئی اور انفورسمنٹ ڈائرکٹوریٹ (ای ڈی) کی چھاپے ماری کارروائیوں میں نمایاں اضافہ ہوا ہے۔

سی بی آئی نے کوئلہ، مویشی اور بالی(بالو) کے اسمگلنگ کے معاملے میں بردوان ضلع میں سات مقامات پر خصوصی تلاشی مہم چلائی۔

سی بی آئی کی مختلف ٹیموں نے آسنسول، جموڑیہ اور رانی گنج سمیت سات مقامات پر کوئلہ اسمگلنگ کے معاملے میں خصوصی تلاشی مہم چلائی۔

سی بی آئی کی خصوصی ٹیم نے کوئلہ اسمگلنگ کے مبینہ ماسٹر مائنڈ ونئے مشرا عرف لالہ اور ان کے معاونین کے مکان پر خصوصی تلاشی مہم چلائی۔ تلاشی مہم کے دوران اب تک کسی کی گرفتاری عمل میں نہیں آئی ہے۔

سی بی آئی کے مطابق ٹھوس ثبوت کی بنیاد پر ہی ونئے مشرا اور ان کے ساتھیوں کے مکانات پر تلاشی مہم چلائی گئی ہے۔

کوئلہ اسمگلنگ کے مبینہ ماسٹر مائنڈ ونئے مشرا کے خلاف لُک آؤٹ نوٹس بھی جاری کیا گیا ہے۔ ونئے مشرا کے کولکاتا میں واقع دفتر پر بھی چھاپہ ماری کی مہم چلائی گئی ہے۔