Naushad Siddiqui رکن اسمبلی نوشاد صدیقی کی ضمانت کی مدت میں توسیع

بھانگوڑ کے رکن اسمبلی نوشاد صدیقی کو عدالت نے عصمت دری کیس میں ضمانت کی توسیع 27جولائی تک کردی ہے۔ کلکتہ ہائی کورٹ کے جسٹس چترنجن داس کی ڈویژن بنچ نے منگل کو یہ حکم دیا۔

کولکاتا: مغربی بنگال کے جنوبی 24 پرگنہ کے بھانگوڑ سے انڈین سیکولر فرنٹ کے رکن اسمبلی نوشاد صدیقی کے خلاف ریپ کیس میں 27 جولائی تک سخت کارروائی نہیں کر سکے گی۔ بارہ جولائی کو انڈین سیکولر فرنٹ (آئی ایس ایف) کے ممبر اسمبلی نوشاد کو ہائی کورٹ نے ان کے خلاف عصمت دری کے الزامات کے معاملے میں تحفظ فراہم کیا تھا۔ اس کیس کی سماعت جسٹس چترنجن داس اور جسٹس اپوربا سنگھ رائے کی ڈویژن بنچ نے کی۔ عدالت نے فریقین کے سوالات و جوابات سننے کے بعد نوشاد کو تحفظ فراہم کردیا۔

پنچایات انتخابات سے تین دن قبل پانچ جولائی کو ایک خاتون نے فرفرہ شریف کے پیرزادہ نوشاد کے خلاف نیو ٹاؤن پولیس اسٹیشن میں شادی کے وعدے کے ساتھ عصمت دری کی شکایت درج کرائی۔ سالٹ لیک میونسپلٹی کے چیئرمین اور ترنمول کانگریس کے لیڈر سبیاساچی دتہ خاتون کے ساتھ موجود تھے۔نوشاد صدیقی نے کہا کہ ترنمول کانگریس ان کے خلاف سازش کررہی ہے۔

بعد میں یہ انکشاف ہوا کہ خاتون کا تعلق ترنمول کانگریس سے ہے اور وہ پارٹی کے مختلف کمیٹی سے وابستہ رہی ہیں۔ شکایت میں انہوں نے دعویٰ کیا کہ وہ بی بی گنگولی اسٹریٹ پر واقع ان کے دفتر میں نوشاد سے ملنے گئی تھیں۔ وہاں ان کی عصمت دری کی گئی۔ اس کے بعد اس نے دعویٰ کیا کہ اس نے کئی بار شادی کا وعدہ کرکے ہمبستری کی۔ شکایت کنندہ اور اس کے بھائی نے نیو ٹاؤن پولیس اسٹیشن میں نوشاد کے خلاف شکایت درج کرائی۔