مغربی بنگال میں کورونا وائرس کے یومیہ کیسز میں کمی آنے کے باوجود اس بیماری سے ہلاک ہونے والوں کی تعداد میں تشویشناک طور پر اضافہ ہونے کا سلسلہ جاری ہے۔ لاک ڈاؤن کے درمیان کورونا وائرس کے نئے کیسز کی تعداد میں تھوڑی کمی آئی ہے جو محکمہ صحت کے لئے راحت کی بات ہو سکتی ہے۔
ریاست میں گزشتہ چوبیس گھنٹوں کے دوران 19 ہزار 117 لوگوں میں کورونا کی تشخیص ہوئی ہے۔ لگاتار یہ دوسرا دن ہے جب 20 ہزار سے کم یومیہ کیسز ریکارڈ کئے گئے۔
ریاستی حکومت اور محکمہ صحت کے لئے تشویش کا باعث یہ ہے کہ کورونا سے ہلاک ہونے والوں کی تعداد میں تشویشناک طور پر اضافہ ہونے کا سلسلہ جاری ہے۔
گزشتہ چوبیس گھنٹوں کے دوران کورونا وائرس کے سبب 147 لوگوں کی موت ہوئی ہے جو گزشتہ کل کے مقابلے بہت زیادہ ہے۔
ریاستی محکمہ صحت نے کہا کہ کورونا کے یومیہ کیسز میں کمی آنے کا مطلب ہرگز یہ نہیں ہے کہ حالات میں بہتری آ رہی ہے، حالات کچھ ٹھیک نہیں ہیں۔ اس سے بھی خراب حالات ہو سکتے ہیں۔
محکمہ صحت کے مطابق ہلاک ہونے والوں کی تعداد میں روز بروز اضافہ ہونا تشویش کا باعث ہے. اس سے ساری محنت پر پانی پِھر سکتا ہے۔