آج 21 جولائی کو شہید دیوس کے موقع پر ورچول ریلی سے خطاب کرتے ہوئے ترنمول کانگریس کی سربراہ ممتا بنرجی نے ایک بار پھر این آر سی سے متعلق بی جے پی پر نکتہ چینی کی ۔
ترنمول کانگریس کی سربراہ ممتا بنرجی نے مرکزی حکومت کو مخاطب کرتے ہوئے کہا کہ بی جے پی کی قیادت والی مرکزی حکومت یہ سوچنے کی غلطی نہ کرے کہ کووڈ کے ماحول میں ہم این آر سی کو بھول گئے ہیں۔این آر سی کی لڑائی کو ہم نے فراموش نہیں کیا ہے ۔
انہوں نے اس موقع پر دہلی فسادات کا ذکر کرتے ہوئے کہا کہ کس طرح دہلی میں انسانیت کا قتل کیا گیا کس طرح مذہب کے نام پر لوگوں کو تقسیم کیا گیا۔کورونا وائرس کے وبائی شکل اختیار کرنے سے قبل پورے میں این آر سی کے خلاف احتجاج و مظاہرے جاری تھے۔
بنگال میں بھی این آر سی کے خلاف بڑے پیمانے پر احتجاج و مظاہرے جاری تھے۔ترنمول کانگریس بھی مرکزی حکومت کے خلاف این آر سی کو لیکر لگاتار تحریک چلا رہی تھی۔ممتا بنرجی نے ایک بار پھر سی اے اے این آر سی کے خلاف تحریک چلانے کا اعلان کیا تھا لیکن اس درمیان کورونا وائرس کی وجہ سے اس تحریک کو نقصان پہنچا ہے۔
ورچول ریلی میں ممتا بنرجی نے امفان طوفان کے بعد راحت رسانی کے معاملے میں اپوزیشن کی جانب سے لگائے گئے الزامات پر وزیر اعلی نے مخالفین پر نکتہ چینی کی۔