TMC Slams BJP بی جے پی دفتر میں جاکر مرکزی وزیر سے ملاقات کرنے کی تجویز کو ترنمول نے مسترد کردیا

ترنمول کانگریس نے مرکزی وزیر نرنجن جیوتی سے بی جے پی کے دفتر میں ملاقات کرنے کی ریاستی صدر سوکانت مجمدار کی تجویز کو مسترد کرتے ہوئے کہا کہ مرکزی وزیر کو راج بھون کے باہر ترنمول کانگریس کے احتجاج میں شامل ہوکر بنگال کے عوام سے معافی مانگنی چاہیے۔

کولکاتا:مغربی بنگال کی حکمراں جماعت ترنمول کانگرنس کے جنرل سکریٹری اور پارٹی کے ترجمان کنال گھوش نے بتایا کہ مرکزی وزیر کو ابھیشیک بنرجی کے دھرنے کی جگہ پر آکر بنگال کے عوام سے معافی مانگنا چاہیے کیوں کہ انہوں نے ترنمول کانگریس کے وفد کو بلا کر ملاقات نہیں کرکے بنگال کے عوام کی توہین کی ہے۔ انہوں نے نامہ نگاروں سے خطاب کرتے ہوئے کہاکہ ترنمول کانگریس کا وفد بنگال کے عوام کے مطالبات کے ساتھ ان سے ملنا چاہتا تھا۔ انہوں نے کہا کہ مرکزی وزیر نے ملاقات کرنے کے بجائے پولس کے ذریعہ ہمارے لیڈروں اور کارکنان پر ظلم کرایا۔ ان کا کہنا مزید کہنا ہے کہ مرکزی وزیر آکر بتائیں کہ 100 دن اسکیم کی بقایا رقم اور ہاؤسنگ اسکیم کے لیے فنڈز کب جاری کیے جائیں گے۔ فنڈز جاری کرنے کو لے کر بات کی جائے تو اور بہتر ہے۔

خیال رہے کہ گورنر سے ملاقات کرنے کے مقصد سے جمعرات سے ہی ابھیشیک بنرجی کی قیادت میں ترنمول کانگریس گورنر ہائوس کے شمالی دروازہ پر دھرنا جاری ہے۔ ترنمول کانگریس کا کہنا ہے کہ گورنر مرکزی حکومت کا نمائندہ ہے۔ اس لیے ہم ان سے ملاقات کرنا چاہتے ہیں۔ ہم انہیں بنگال کے عوام کی طرف سے لکھے گئے خطوط انہیں سونپنا چاہتے ہیں تاکہ وہ مرکزی حکومت کو بھیج سکیں۔