Bengal Panchayat Elections Result، بنگال پنچایت انتخابات کے نتائج، ضلع پرشید پر ٹی ایم سی کا مکمل قبضہ برقرار

ممتا بنرجی کی قیادت والی ترنمول کانگریس نے پنچایت انتخابات میں تاریخی جیت درج کرتے ہوئے ضلع پریشد کی تمام سیٹوں پر اپنا قبضہ برقرار رکھا ہے اور یہاں سے اپوزیشن کا مکمل طور پر صفایا کر دیا۔

کولکاتا: مغربی بنگال کی حکمراں جماعت ترنمول کانگریس نے ریاست کے 22 اضلاع میں 928 ضلع پرشید کی سیٹوں میں سے تقریباً تمام نشستوں پر جیت درج کی ہے۔ یہاں اپوزیشن جماعتوں کو تمام سیٹوں پر شکست کا سامنا کرنا پڑا ہے۔ ذرائع کے مطابق ریاستی الیکشن کمیشن کے اعداد و شمار کے مطابق ترنمول نے ریاست کے 22 اضلاع کی 928 ضلع پریشد سیٹوں میں سے 685 پر کامیابی حاصل کی ہے۔ وہ مزید 144 سیٹوں پر آگے ہے۔ بی جے پی امیدواروں نے 21 سیٹوں پر کامیابی حاصل کی ہے۔ دو سی پی ایم اور چھ سیٹوں پر کانگریس کے امیدواروں نے کامیابی حاصل کی۔

ترنمول کانگریس ضلع پرشید کی تمام سیٹوں پر کامیابی کے لئے پرعزم ہے جبکہ اپوزیشن جماعتوں نے انتخابات میں بدعنوانی کا الزام عائد کیا ہے ۔جنوبی 24 پرگنہ میں ضلع پریشد کی سب سے زیادہ سیٹیں ہیں جہاں نشستوں کی تعداد 85 ہے۔ کمیشن کے اعداد و شمار کے مطابق ترنمول نے ان میں سے 74 سیٹوں پر کامیابی حاصل کی ہے۔

اس ضلع میں اپوزیشن لیفٹ-بی جے پی-کانگریس پارٹی کھاتہ نہیں کھول سکی۔ اس فہرست میں مرشد آباد دوسرے نمبر پر ہے۔ ترنمول نے یہاں کی 78 ضلع پریشد سیٹوں میں سے 66 پر قبضہ کر لیا ہے۔ کانگریس کو چار سیٹیں ملی ہیں۔ اس کے بعد مشرقی مدنی پور ہے یہاں ضلع پریشد کی نشستوں کی تعداد 70 ہے۔ ترنمول نے یہاں بھی 55 سیٹوں پر قبضہ کیا ہے۔

تاہم، ادھیکاری گڑھ کے نام سے مشہور اس ضلع میں بی جے پی نے آٹھ سیٹیں جیتی ہیں۔ نشستوں کی تعداد کے لحاظ سے شمالی 24 پرگنہ اور مشرقی بردوان اس فہرست میں شامل ہیں۔ دونوں اضلاع میں 66 نشستیں ہیں۔ جس میں کمیشن کا کہنا ہے کہ ترنمول دونوں اضلاع کی تمام سیٹوں پر جیت رہی ہے۔ دیگر اضلاع میں بھی اس کی جیت تقریباً طے ہے۔