مغربی بنگال کے مالدہ ضلع کے ماتھاباڑی سے ترنمول کانگریس کی رکن اسمبلی اور وزیر شبینہ یاسمین نے ترپورہ میں ترنمول کانگریس کے رہنماؤں پر جان لیوا حملے کی مذمت کرتے ہوئے قومی حقوق انسانی کمیشن کی تنقید کی۔
ریاستی وزیر شبینہ یاسمین نے کہا کہ دو ماہ قبل مغربی بنگال میں اسمبلی انتخابات 2021 ختم ہوا ہے۔ اسمبلی انتخابات 2021 کے دوران ملک کی دیگر ریاستوں سے تعلق رکھنے والے بی جے پی رہنماؤں نے متعدد دفعہ مغربی بنگال کا دورہ کیا لیکن کسی بھی رہنما پر حملہ نہیں ہوا۔
انہوں نے کہا کہ مغربی بنگال میں دوسری ریاستوں سے آنے والے سیاسی رہنماؤں پر حملہ کرنے کا کوئی کلچر ہی نہیں ہے لیکن جب ہماری پارٹی کے رہنما دوسری ریاستوں میں جاتے ہیں تو ان پر حملہ کیا جاتا ہے۔
ریاستی وزیر نے کہا کہ ترپورہ میں ترنمول کانگریس کے رہنماؤں کے ساتھ جو کچھ بھی ہوا، اس سے یہ صاف واضح ہوتا ہے کہ کس میں سیاسی انتقام کا جذبہ زیادہ ہے اور کس میں نہیں۔
یہ بھی پڑھیں: جنتر منتر معاملہ: قومی اقلیتی کمیشن کا ڈی سی پی کو نوٹس
انہوں نے کہا کہ میں تریپورہ میں ترنمول کانگریس کے رہنماؤں پر حملے کی سخت الفاظ میں مذمت کرتی ہوں، اس کے خلاف مالدہ ضلع میں بی جے پی کے خلاف احتجاجی جلوس نکالا جائے گا۔
واضح رہے کہ گزشتہ سنچر کے روز تریپورہ میں ترنمول کانگریس کے رہنماؤں پر نامعلوم شرپسندوں نے حملہ کیا تھا جس میں دو لوگ زخمی ہوگئے تھے۔ اس واقعے کے بعد تریپورہ پولیس نے ترنمول کانگریس کے ہی رہنماؤں کو حراست میں لے لیا تھا۔ مغربی بنگال کی حکمراں جماعت ترنمول کانگریس کی سربراہ اور وزیراعلیٰ ممتا بنرجی نے اس واقعے کی پر زور مذمت کی تھی۔
